Author: Novels

9

 

“Innalillahi wainnailaihi ilaihi rajiun! Allahumma ajirni fi masibati haza wakallifna minha!”

Lafazin da Malam ke ta nanatawa kenan ya na mai kawar da kai daga kallan Zainab. Sai da su ka tabbatar ya tsaya sosai da kafafun sa sannan su ka sake shi, kamar wanda be da lada a jiki haka ya juya ya nufi cikin gida, shi kan shi tafiyar kawai ya ke ba tare da ya san ya na yi ba, haka kuma be fasa furta “Innalillahi wainnailaihi ilaihi rajiun” dan kuwa tun da ya zo duniya be taba tsammanin zai ga rana irin ta yau ba.

Ganin Malam ya shige ciki Jauro ya sami damar kallan Usman ya ce

“Toh munafuki ka tona ka ji dadi ko? Dan bakin ciki ai sai ka zuba ruwa a kasa ka sha! Ga dai halin da ka sa bawan Allah!”

Shiru Usman ya ma sa gaba daya hankalin sa kan Yakura ya ke, musammam da ya ga ta daura hannayen ta biyu a ka ta na rusa kuka mai ratsa zuciya. Kirjin sa cike da tausayin ta ya matsa kusa da ita da niyar mata magana, kan ya kai ga bude baki ya furta komai ta daka masa tsawa cike da tsana ta ce

“Dallah kar ka matso kusa da ni munafukin banza munafukin hofi, na tsane ka, na tsane ka tun randa na fara dora idanu akan wannan muguwar fuskar ta ka, Allah ya isa tsakani na kai!”

Ta wuce ciki fuuuu, in da Jaura ke kara goyan bayan abun da ta fada ta hanyar yiwa Usman shagude. Isa wanda gaba daya ya rasa ta cewa ne ya matso kusa da shi, ya dan taba kafadar Usman, sannan ya wuce dakin su na Maigadi, zuciyar sa cike da al’ajabi.

Yanda ya shigo falon afujajan, fuska fal hawaye ga salati ya na futa daga bakin sa ne ya ruda su Ammy da Halitta wanda har lokacin ba su san wainar da ake toyawa a waje ba, su dai suna nan cikin tashin hankalin rashin samin Zainab a dakin ta.

“Malam lafiya? Me ke faruwa? An yi Rashi ne?”

Zama yayi dirshen a kan carpet, kai ya ke jinjinawa yayinda ya fashe da kuka mai karfin, ya na kuka ya ke fadin

“Innalillahi wainnailaihi ilaihi rajiun”

Daga Ammyn har su Halitta su ma din kukan su ka sa, Dan kuwa ganin kukan Malam ba karamin tashin hankali ba ne. Ammy na kuka ta ke fadin

“Malam me ya faru Yakura ta mutu ne?”

Duban ta ya ke da idanun sa da su ka yi jajur, tsabagen bacin rai jikin san har rawa ya ke, murya na kakkarwa ya ce

“Da wannan mummunar ranar gwara ranar mutuwar Zainab! Har ki na tambaya ko ta mutu? Wato kin ma san da fitar ta? Ki na nan shashashar uwa diyar ki na haura katanga ta fita yawan banza ki na tambaya ta ko mutuwa ta yi?”

Ammy na mai girgiza kai ta ke fadin

“Ban da masaniya idan ba dazu da na duba bata nan ba, wallahilazim kamar yanda ba ka sani ba…..”

“Ina amanar da na baki? Yau na yi dana sanin yawan nisa da ku da na ke yi! Yau na yi danasanin tura Yakura jami’a can uwa duniya! Yau na yi dana sanin rashin aurar da su da wuri da ban yi ba! Kun cuce ni! Yanzu ace cikin ku duka babu wanda ya san wannan halin da Zainab ke aikatawa ba? Har Mai gadi da yan unguwa su sani amma ku da kuke tare da ita ba ku sani ba?”

“Wallahi ban sani Malam, wallahi ban sani ba in ba dai yau da Halitta ta sheda min ba……..!”
Cewar Ammy wacce kafin ta kai aya Malam ya katse ta cikin tsawa ya ce

“Halitta ta sheda mi ki? Halitta kin sani ki ka boye min saboda tare kuke lalacewar ku ko? Tare ku ke cin mutunci na?”

“Wallahi Dady ba tare mu ke ba, ban taba aikata makamancin haka ba, tsoran halinda za ka shiga ya sa ban fada mu ku ba……”
Halitta ta bashi amsa cikin kuka. Murya kasa kasa ya ce

“Halin da zan shiga? Kin gwammaci yar uwar ki ta cigaba da aikata barna ta na sabawa Allah ta na bata min suna a gari akan halin da zan shiga? Maigadi da yan unguwa su na gani har ana taruwa kofar gida na domin a sheda fuskar fitinanniya cikin ‘ya’ya na! Zainab da na ke ikirarin ta fi kowa cikin ‘ya’yq na sai ga ta tsakar dare tsakiyar maza sun dage sai sun ga kowacece ake kawo ta a mota, ta na haurawa tsabagen lalacewa da wulakanci?????”

“Innalillahi wainnailaihi ilaihi rajiun!”

Wannan karan Ammy ce ke salati, hakan yayi daidai da shigowar Zainab wacce dama ta dade ta na shawarar shigowa falon ko kuwa ta yi zaman ta waje. Ganin ta Ammy ta yi wuf ta damko ta tana mai rufe ta da duka, fadi ta ke

“Gwara na kashe ki Yakura! Gwara na kashe ki kafin ki kashe mu, haihuwa ba ta yi rana ba! Kashe ki zan yi na huta”

Ihu da kukan Zainab be saka an ceto ta daga hannun Ammy ba, Malam na mai kawar da kai ya ce

“Dukan ta da ki ke ba zai amfana mana komai ba, Zainab ta wulkanta ni, Ashe zan haifi diya irin ki Zainab? Ashe duk Kamala da na ke ganin ki da ita duk na munafunci ne? Innalillahi wainnailaihi ilaihi rajiun yau na yi danasanin haihuwar diya mace irin ki Zainab, kin zalince ni, kin haince ni kin ci amana ta Zainab…….”

Kaucewa ta yi daga rukon Ammy, da sauri ta karasa gaban Malam, hannayen ta biyu ta sa ta ruko kafafun sa fadi ta ke

“Dan Allah Dady ka yafe min, Dady ka yafe ni, Dady ka yafe min na tuba, duk hukuncin da ka yanke kai na zan bi, zan auri wannan dan abokin na ka da ka ke so na aura, amma dan Allah Dady kar ka min baki…..”

Jin haka sai ga Malam ya murmusa, ya na mai share hawaye ya ce

” Ana idar da sallar asuba ku zo ku same ni a nan falon da na ke ba da karatu!”

Ya tashi cikin hanzari har ya na hambare Zainab ba tare da ya kula ba ya fice ya bar Zainab hannun Ammy, dan kuwa ba ta fasa jibgar ta ba har sai da Halitta da Falmat su ka tausaya mata su ka shiga tsakani. Ammy na haki tsabagen yanda ta daki Zainab ta ce

“Da sani na zaune ki tun ran da na haife ki da baki ja min wannan masifar ba!”.

******

Kamar yanda Malam be runtsa ba, haka iyalan sa su ka yi kwanan zaune. Ko da aka kira sallar asuba Malam be fasa fita ya ja salla a masallaci ba. Bayan an idar ne ya nemi ganin masu gadin sa duka ukun.

Zaune su ke falan da su ke daukar karatu, Malam zaune bisa doguwar kujerar sa, su Usman zaune gaban sa suna ta raba idanu cikin jiran tsammani. Jim kadan Ammy ta yi sallama, sanye ta ke cikin hijabi tun daga sama har kasa, kallo daya za ka mata ka tabbatar da matsanincin damuwar da ta ke ciki. Biye da ita Halitta da Falmat ne, suma din hijabin ne jikin su.

Halin da ake ciki be hana Halitta satar kallan Usman ta wutsiyar ido ba, ta na mai adduar Allah ya sassauta mata son da ta ke yiwa wannan bawan Allah dan kuwa ko an kai dubu shi kawai ta ke iya hangowa duk inda ya ke muddin ta sa kafa a wajan. Ganin Malam ba shi kadai ba ne ba ya sanya su ka sami waje can gefan Malam domin samin tazara sosai tsakanin su da su Usman.

Malam na shirin tamabayar ina Zainab sai ga ta nan kamar an cefo ta. Har lokacin hijabin da ta fita da shi ne a jikin ta, ta na shiga ta tsinci idanun ta cikin na Usman, hakan ya sa ta mummunar faduwar gaba tare da fargabar dalilin da ya sa Malam tara su tare da ma’aikatan sa maza, ta yi saurin dauke kan ta, kusa da su Falmat ta samu ta dan rakade. Malam kuwa ganin Zainab jiyayi wani ciwon bakin ciki ya tasar ma kahon zuciyar sa, idan akwai abin da ya tsani gani ya bi bayan Zainab. Gaba daya ta bata kan ta a idanun sa dan ji yake kamar ya sallama ta ya huta. Zaman ta ke da wuya Malam na mai kawar da tunanin da ya ke cikin zuciyar sa ya furta

“Na san za ku yi mamakin dalilin da ya sa na tara ku nan tare da iyali na, Amma kafin na aiwatar da komai, ina so na san shin bayan diya ta da take haurawa ta na fita yawan dare, ku na ji kuna gani amma ku ka ki fada min, wata amana ta ku ka ku ke ci?”

Ya na maganar ne idanun sa kan su Usman, in da duka su ka sunkuyar da kai, musammam Jauro wanda in ban da zufa babu abin da ke keto masa. Shiru ne ya biyo baya kafin daga bisani Isa ya nisa ya ce

“Allah shi gafarta Malam, na rantse ma ka da Allah ban taba cin amanar ka ba, wallahi tallahi ban da masaniya akan wannan lamari da ya faru a daren yau, Ni ma lamarin sabo ne a gare ni”

Ya kare maganar na sa cike da ladabi ya na mai tausayawa Malam dan kuwa damuwa tuni ta bayyana a tare da shi, lokaci guda tsuafar shi ta bayyana karara. Jauro na mai sakar zuciya ya sa hannu ya goge zufar da ke keto masa, jin Malam ya ce

“Malam Jauro! Shin ka na da masaniya a kai?”
“Ah ah Malam, lillahi wa rasulillahi ban da sani akan wannan lamari!”

Ya ba da amsa cikin sauri ba tare da ya damu da kallan da Usman ya ke masa cike da mamaki ba. Shi kuwa Malam Usman ya ke kallo ya na mai nazari akan shi, bayan wasu yan dakikai Malam ya furta

“Sai kai Usman, tun yaushe ka san da wannan barnar?”

Idanun Zainab da Halitta kan Usman yayinda ko waccar su bugun zuciyar ta ya karu, in da na Halitta ke bugawa cike da tausayi, so da kaunar Usman, haka na Zainab ki bugawa cike da gaba, tsana da kiyayyar da take masa, gani ta ke duk duniyar nan ba ta da makiyi da ya wuce Usman. Cike da ladabi Usman ya ce

“Ka yafe min Malam, ba a yi cikakken wata da sani na ba”

“Wani dalili ya hana ka sheda min”

Shiru ne ya biyu baya, dan kuwa Usman ya kasa budar baki ya bawa Malam amsa, sai ma sunkuyar da kan sa kasa da yayi. Malam ya ce

“Ka yarda ka ci amana ta?”

Usman yayi shiru ya na mai dada sin da kai. Malam na mai kara jaddada tambayar sa ya ce

“Ka yarda ka ci amanar gadin da na ba ka? Ka yarda ka cutar da ni?”

Usman na mai girgiza kai ya ce

“Na yarda Malam”

“Ka amince da duk hukuncin da zan yanke akan ka, ko da kuwa na korar ka daga gida na ne? ko kuma hana ka cigaba da aikin gadi a gida na daidai ne? Ka yarda adalci ne?”

Wannan magana ta Malam ba karamin dadi ta yiwa Jauro ba, dama tunda Usman yayi azarzabin rufawa Malam asiri gaba daya bakin ciki da kishin Usman zai zama numba daya gun Malam ya kama shi, Amma ko da ya ga reshe ya juye da mujiya tuni zuciyar shi ta yi kal, shi dai fatan sa kar Usman ya shedawa Malam har da hadin bakin shi Zainab ke samin damar fita, gwara Malam ya kore shi kowa ya huta.

Halitta kuwa idanun ta ne ya ciko da kwalla, musammam da ta ji ya amsa da

“Na yarda Malam!”

Tuni ta fara kukan zuci, Dan ta san halin Malam ya iya yanke hukunci cikin fushi, sam ba ta so ya kori Usman ko da kuwa zai dawo yayi dana sani. Shiru ne ya biyu baya, kafin daga bisani Malam ya nisa tare da fadin

“Menene dalilin ka na rufa min asiri bayan ka bari ana barna a bayan ido na?”

Shiru Usman ya kasa amsawa, Malam be gushe ba, ya kara fadin

“Shin wani abu na ma ka da na cancanci wannan abu biyu daga gare ka? Cin amana da kuma rufin asiri? Ka ci amana ta, daga baya ka zo da rufin asiri? Ka na da wata manufa ne na yin haka?”

Usman na mai girgiza kai ya ce

“Ina neman yafiyar ka Malam, dan Allah ka min yafe min, ban da wata manufa da ya wuce kare mutuncin ka da gujewar tashin hankalin ka, na yi kuskure, ka yafe min”

“Kai wanene?”

Malam ya kara masa tambaya mai rikitarwa. Cikin nuna rashin fahimta ya ce

“Ni Usman ne, ban taba tunanin cin amanar ka, ko kuwa zaluntar wani daga cikin iyalin ka ba”

Malam na mai duban shi cikin nazari ya ce

“Iya binciken da na yi akan ka kai bafulatani ne dan cirani, ka fito daga wata ruga da ake kira Rugar Shehu, bayan abin da ka min a yau ya sanya ina tsoran zamantakewa ta da kai, dan kuwa idan har za ka iya ganin diya ta cikin halaka haka ka kawar da kai, to ko shakka babu za ka iya halaka ni kai na! Wannan ya sa na ke son jin cikakken tarihin rayuwar ka, wanene kai, da wata manufa ka zo gida na?”

Maganar Malam ta sanya zuciyar Usman rauni, cikin kokarin kare kan sa ya furta

“Allah ya sani ban zo da cuta ba tun ranar da na sa kafa ta gidan nan, haka ma yanzu da na ke zaune gaban ka. Kamar yanda ka sani tun a baya, Sunana Usman, Usman Tanko, na zo ne daga rugar Shehu, in da maihaifina shi ke da sauratar Shehuntakar rugur, Ya gada ne tun kaka da kakan ni. Ba mu da takamamman wajan zama, dan haka yawo mu ke daji daji, mukan yada zango a duk dajin da Allah ya nufa, muddin akwai ruwan da shanun mu za su sha, haka ciyawa da da harawar da za su ci. Babban abin da Rugar Shehu ta yi suna akai kuwa shine surkulle dan haka ba ma zama a daji sai an yi surkulle an kafe dukkannin dajin kaf ciki da waje ya zama mallakin mu…………..”

 

 

*Khadija Sidi*AUREN SHEHU

10.

Khadija Sidi

 

Cikin daji mai suna santali wanda ya ke arewa moso gabashin mararrabar Nigeria da Nijar ne Rugar Shehu su ka yada zango. Babu laifi akwai ruwa da ‘yayan itatuwa wadatacce hakan ya sanya su jimawa a dajin. Rugar Shehu ba su da wani yare face fulatanci, ka?an daga cikin jama’ar rugar wanda su ke fita suna cudanya da hausawa ne ke jin hausa.

Babu laifi mahaifina ya yi aure aure da yawa, duk a dalilin neman magaji kasancewar duka matan sa ‘ya’ya mata su ke haifa masa wanda da sun kai shekara goma sha uku zuwa sha biyar ake mu su aure. Sai da ya haifi ‘ya’ya Ashirin duka mata, har ya fitar da rai dan kuwa shekaru sun ja ya bawa arbain baya, sannan Allah ya amsa masa ya azurta matar sa ta hudu wacce dama ita ta fi kuwa karancin shekaru da haihuwar da namiji.

Murna gun mahaifina ba a magana dan har kyautar shanu biyu mace da namiji yayiwa unguwar zoma da ta karbi haihuwar. In da mahaifina ke murna samun magaji, Dan uwan shi wanda ya ke cikin ummansa, shi maihaifina ya sha nono ya bar ma, babban abin bakin ciki ya zame masa dan kuwa ya ci burin kujerar da mahaifina ke kai, rashin magajin mahaifina shi ne babban takobin da ya rike.

Kamar yanda Baffa Mudi ke bakin cikin jaririn da aka haifa, haka ma sauran matan gidan su ka nuna bakin ciki karara, dan sam babu wacce ke hubbasa wajan taimakawa mai jego, haka ta yi jegon ta sai dai ‘ya’yan ta mata ko kuwa dai mokota su agaza mata, idan kuwa an ga sauran matan kusa to lalle mahaifina ke kusa, ana yi ne dan ganin idanun sa. Haka a daddafe sati ya zagayo, ranar suna aka sanya min suna Usman, mahaifina ke kira na “Magaji” wannan kalma ta zamo tamkar wuka a kirjin Kawu Mudi.

Baffa Mudi ne dan uwa daya tilo da su ke ciki daya da Mahaifina, su biyu kacal Mahaifin su ya haifa a duniya. Matar Baffa Mudi daya, haihuwar matar shi goma sai dai biyar daga ciki sun rasu, biyar kadai ke a raya, duka mata ne. Bayan an haife ni da sati biyu matar Baffa Mudi ma ta haifi dan ta namiji, yaro ya ci sunan Mahaifina amma ana kiransa da Tanko.

Gata da soyayya karara da mahaifina ke nuna min ba karamin bakin jini ya jawowa Iya ta da ni kai na ba. Haka rayuwa ta cigaba da tafiya, ana jifa da surkulle domin halaka mu, Allah kuma na kare mu.

Tun kafin na cika shekara biyu a duniya na yaye kai na na ki nono, Wanda hakan ya nunawa Iya ta alamun cikin da ta ke dauke da shi. Murna gun mahaifina ba a cewa komai, shi dai fatan sa Allah ya maimaita a haifa ma sa da namiji. Cikin da Iya ta ke dauke da shi ya sanya Mahaifina dakatar da canza shekar da ake da niyar yi duk da kuwa ruwa da kayan itatuwa sun ja baya. Wannan ya bawa Baffa Mudi damar yiwa mahaifina zagwan kasa ta hanyar hore mu su kunne akan wannan hukuncin da mahaifina ya dauka saboda a cewar shi hakan na nuna rashin adalcin Shehun rugar. Da ya ke jama’ar rugar Shehu amintattu ne, kalilan ne su ka dauki zugan Baffa Mudi dan haka hakan sa bai cimma ruwa ba, Nan dajin Santali Iya ta ta sake haifo dan ta namiji, da mako ya zagayo aka sanya masa Muhammadu Bello.

Sai da Bello ya dan yi kwari sannan aka tasanma barin dajin Santali, nan mu ka niki gari, mu ka hada kwan mu da kwarkwatar mu, mu ka shigo Nigeria, mu na tafe muna tare da shanun mu su na kiwo, duk in da dare ya mana mu yada zango. Duk yanda mu ka so kiyaye shanun mu kar su shiga gona, yau da gobe sai sun shiga, dan haka ko da yaushe cikin fada mu ke da manoma, wani sa’in har a kai da bata kashi. A haka Allah ya isar da mu wani yanki da ke cikin kungurmin dajin falgore. Bayan dube dube da Maihaifina yayi na surkulle ya ce a kafa bukkar rugar Shehu a nan dajin. Cikin sati daya aka kafe dajin nan kaf ya zama babu mahalukin da ya isa ya dumfari rugar Shehu da kowani barna ko mugun nufi.

Toh rayuwar ruga dai haka mu ke yin ta, babu wutan lantarki, babu asibiti, babu makaranta babu ko wani irin taimako daga gwamnati dan kuwa idan ba dai wani tarzoma ta hado mu da manoma ba gwamnati ba ta waiwayan mu bare ta ba mu agaji, dan haka ban san wani abu wai shi boko ba. Ina da shekara hudu a duniya matar Baffa Mudi ta kara haihuwa, ta haifi diya mace wacce aka sa mata suna Ummakaltime, ana kiran ta Cangwai.

Kasancewar mahaifina shi ne Shehun rugar dama shi ke koyar da yara da samarin ruga karatu wanda ya hada da kur’ani, littafan addini, sai kuma rubutu da karatun ajami. Soyayyar da ke tsakanin mu, da Kuma ganin ni ne magajin shi wanda ya ke sa ran zan zama shehu ya sanya shi ya fara ba ni ilimin surkulle tun ina dan shekara takwas a duniya, duk yanda ya so ya jawo Bello jiki a koyar da mu tare hakan ya gagara saboda lalurar bebantaka da ta sami Bello sanda ya na da shekaru biyar a duniya.

Ba na manta ranar ta kasance wata juma’a ne aka tashi da rashin ladanin Rugar Shehu, bayan an masa sutura, aka kai shi kushewa aka rufe mu ka dawo gida mu tadda Bello na ta kurari da kuka, juyin duniyar nan an yi ya fadi abin da ke damun shi, amma ya gagara sai dai gwalangwalanto, wanda hakan shi ne karshen maganar sa kenan duniya.

Sanda na cika shekara goma na fara kora shanu nawa na kai na, Mahaifina ya ba ni mace da namiji wanda su ke aure, cikin shekaru kalilan su ka hayayyafa sosai Allah ya albarkaci kiwo na sai gani da shanu har guda koma, sanda na cika shekara shabiyar a duniya shanu na tuni sun kai ishirin.

Ba yaban kai ba, tarbiya da kuma yanayin karatu da na ke samu daga wajan Mahaifina ya sa na fita daban daga sauran matasan rugar mu, idan ka dauke Baffa Mudi da iyalan sa babu wanda ba ya girmama ni a rugar Shehu. Sam ba ma ga miciji da Tanko dan Baffa Mudi, dan kuwa yayi kauran suna wajan fiti na da neman fadan manoma, hakan nan babu gyara babu dalili ya ke kora shanu cikin gona su yi barna su bata amfanin gona ba dan komai ba sai dan neman fitina. Da ta fara fitinar mutane ne Mahaifina ya Umarci Baffa Mudi da yayi wa Tanko magana, ko dai ya canza hali, ko kuwa ya bar masa rugar baki daya. Maganar da ta kara kawo rashin jituwa tsakani na da Tanko kenan, har ta kai ba ya amsa sallama idan na masa.

Idan kuwa batun amana ne sau dayawa jama’ar rugar Shehu na bani amanar Shanun su duk sanda su ke da uzuri, cewar su duk rugar Shehu ni kadai zan kora shanun jama’a na kiyaye mu su kamar yanda zan kora nawa, kafin ka ce menene tuni na kasance kamar mataimaki gurin Mahaifina wanda shekaru sun ja sosai, hidimomi da dama ba ya iya yi, duk yanda Baffa ya so ya ja ragamar shehuntakar kuma Mahaifina ya ki sakar masa, sai dai ya sanya na wakilce shi, cewar sa tunda ina da nutsuwa zaifi na fara gwada mulki tun ya na raye.

Ba zan manta da wata ranar labara ba, lokacin ina da shekara goma sha bakwai, na dawo daga kiwo Mahaifina ke fada min shawarar da su ka yanke na daura min taubashiyata, daya daga cikin ‘ya’yan Baffa Mudi, wato Cangwai. Cangwai dai yarinya ce mai hankali da nutsuwa, wajan kyawu ma babu laifi, idan aka dauke kiyayyar da mahaifin ta ya ke min sam bata da laifi, dan haka na yi na’am tare da godiya da wannan hadin.

Iya ta kuwa nunawa ta yi sam ba ta yarda da wannan hadin ba, a cewar ta ba hadin alkhairi ba ne, yanda Baffa Mudi ba ya kaunar mu me zai sa ya so ya kulla wannan kulli haka? Sai da rai ya baci sosai tsakanin ta da Mahaifina, ni na zaunar da ita, na nusar da ita ce komai nufi ne na Allah, muddin ba ma nufin kowa da sharri to kuwa Allah ba zai bari a jefo mu da sharri ba, ta kwantar da hankalin ta, khairan in Sha Allah.

Da haka da haka aka daura min Cangwai. Daya daga cikin bukkokin da ke wajen gidan Shehu mu ka tare cikin yarda Allah. Bayan sati daya da auren mu Cangwai ta fara laulayi, Iya ta ce ta fara lura da cikin da ta ke dauke da shi, za ta yi surutun yayi wuri na ce da ita babu komai ni da iyali na mun yi tarayya tun a daran fari, dan haka ba wani abu ba ne dan ta na dauke da juna biyu.

Abu dai kamar wasa cikin kankanin lokaci cikin Cangwai ya bayyana sosai, Ni kai na na kanyi mamakin shin watanni nawa da auren mu da har abu zai fito sarari haka kamar kwarya? Gashi mu ba asibiti ba bare bokan ture ya duba ya fada min adadin watannin cikin.

Dangantakar mu ya sanya ban yi kokarin neman warware wannan sarkakkiyar ba, na rufa asiri mu ka zauna haka, ko da wasa ban taba nuna mata wani damuwa ko bambamci ba, ina kula da ita kwatankwacin yanda na ke ganin Mahaifina ke kula da Iya ta, sai ita ce ma da na ga kamar ta na cikin damuwa, duk sanda na so na ji dalilin ta kan ce min babu komai.

Iyar ta kullum ta na hanyar gidan mu, haka ma Baffa Mudi, ni kuwa sam ban taba kawo wani abu cikin rai na ba. Cikin wannan halin mu ka kai wata shida tare da Cangwai. Wata ranar lahadi da daddare na dawo daga hirar dare na tarar Cangwai ba ta bukkar mu, na yi tsammanin ta zagaya bayan gida, ni kuwa dama na debo gajiya sai na yi kwance bisa gadon karar mu bacci na diba na sama sama

Ban yi cikakken minti goma da kwanciyar ba kamar daga sama na ke jiyo muryar su, a bakin kofar bukkar na ji mahaifiyar Cangwai na tambayar yaushe zan dawo. Cangwai ta ba ta amsar da sai can cikin dare ai wajan hira na je, Bukkar su ka shigo, Cangwai na niyar kunna futular acibalbal Iyatar ta ce ta bari saboda ba ta san jama’ar gidan su san da zuwan ta.

Ina shirin mu su gyaran murya dan su san da ni kenan na ji Iyar Cangwai ta ce

“Ba dai ki tona mana asiri ba ko?”

Mutuwar zaune na yi jin amsa Cangwai na cewa

“Ah ah Iya, Amma wallahi a tsorace na ke, gani na ke kamar fa ya san ba cikin shi ba ne, dama Baba ya sani ya bari sai da na zo gidan na sami cikin halak, ai ya fi……”

Wani irin zufa na ji ya na keto min, Ashe dai duk yanda na so kar na zargi baiwar Allah nan ashe hainta ta su ka yi. Babban abin taikaici shi ne amsar da iyar ta ta bata, cewar ta

“Ke yiwa mutane shiru! Wa ya ce mi ki Baban na ki ya na so ki haifa masa jika da wannan la’anan nan yaron? Ko kin manta dalilin da ya sa ki ka tare da sangami har ya mi ki ciki?”

“Sangami”

na maimaita cikin rai na, Sangami na daya daga cikin fitattun matasan da ke wata ruga kusa da rugar Shehu, mahaifin sa yayi suna kwarai wajan tarin shanu, haka kuma abokin fitinar Tanko ne. Iyar Cangwai ba ta gushe ba ta kara da

“Kar ki manta yarjejeniyar da aka yi tsakanin Mahaifin Sangami da na ki, na farko dai ki samu ki haife dan nan, wannan wawan mijin na ki da Shehu su gama azazzabin samin magaji, sai a sheka su barzau, kin ga kenan burin Mahaifinki na zama Shehu ya tabbata, ke kuwa mu aurar da ke ga Sangami, tare da bawa baban shi rabin shanun rugar Shehu kamar yanda aka yi alkawarin matukar ya taimaka aka dauke Shehu da magajin su daga doran kasa, shi wancan beben dan na sa da mu ka lakasa tun shekarun baya be Isa ya aiwatar da komai ba, ina Bebe zai iya shehuntakar ruga? Ina ya ga bakin magana?…..”

“Usman mutumin kirki ne Iya, ba ki ga yanda ke mutunta ni ba, ya na kula da ni…..”

Cewar Cangwai cikin nuna damuwa, cikin hantara Iyar ta ta ce

“Ke rufawa mutane baki! Ko dai kin fara son shi ne?”

“Ah ah”

“Toh idan kin fara sai ki zaba ko shi ko uban ki! Dama abin da ya kawo ni kenan! Na ja kunnan ki! Sakarya kawai na ji kin tona mana asiri uban ki ne a rana ai”

“Zan kiyaye!”

Da wannan Iyar Cangwai ta tafi, Cangwai ta fita ta dan taka mata. Jiki sanyaye na tashi zaune, dan tashin hankali na ma rasa abin yi bare na motsa. Zuciyar ta daya ta dawo, ashanar da na mata tsaraba da shi sanda na fita kiwo ta kesta haske ya gwauraya daki hakan ya bata damar ganina zaune na doka tagumi fuska fal zufa kamar wanda ke zaune gaban wuta.

A razane ta ke dubana yayinda jikin ta ya dau kyarma, saura kirin ta wulgar da acibalbal din da ke rike a hannun ta Allah ya sa na tashi da sauri na riko shi. Gefe in da mu ka saba ajiyar shi na aje. Ina mai bata baya dan sam ba na kaunar ganin ta, na ce

“Me ku ka yi ku ka nakasa kanina Bello?”

Murya na rawa da alama ta fara kuka ta amsa min da cewa

“Dan Allah kar ka tona min asiri, ka rufawa Mahaifina asiri na maka alkawarin kare lafiyar ka da mahifin ka….”

“Ba wannan na tambaye ki ba!”

Na katse ta cikin tsawa, juyowa na yi na karasa gaban ta, hannaye na biyu bisa kafadar ta ina mai jijjiga ta ba tare da na yi la’akari da tsohon cikin da ta ke dauke da shi ba na ce

“Me ku ka yiwa kanina ya dena magana?
Ko ki fada min ko na halaka ki da cikin shegen da ki ke dauke da shi nan take kafin na je na riske azzalumin uban na ki”

Yanda ta ga na rikide cikin kankanin lokaci ya sanya ta kara tsorata da lafazan da ke futowa daga baki na, tana kuka ta ke fadin

“Lokacin da abin ya faru ina da karancin shekaru, Amma dai na san surkullen da aka yi masa da tare da gawa aka hada aka birne, yanda gawar ba za ta kara magana a duniya ba, haka shi ma Bello ba zai sake magana a duniya…….”

Tas na dauke ta da mari kafin ta kai da karasa maganar ta, ta yi baya sauran kiris ta fada na riko ta da sauri cikin danasanin marin ta da na yi, dan kuwa tun da na zo duniya ban taba dukan wata diya mace ba, face Cangwai.

“Dan Allah ka yafe min, kada ka halaka ni, zan hade kaya na, na bar rugar Shehu ba zan sake dawowa ba har abada”

Takaici ya sa na kasa magana, kallan ta na ke cike da tsana karara cikin idona. Mun kai kusan minti biyar cikin wannan halin kafin na sake ta, rai na na kuna fice da bar mata Bukkar gaba daya gudun halin zuciya.

Bukkar Mahaifina na nufa, ganin babu alamar haske ya sanya na sake shawara, na juya na fice ba tare da na dubi bukkar Iya ta ba, dan kuwa ba na jin zan iya tunkarar ta da wannan maganar ta tashin hankali cikin dare haka. Can turkar shanu na na je, Nan na kwana amma ban runtsa ba, yanda na ga rana haka na ga dare, sai da asuba ta yi sannan bacci ya fara dauka ta, ban kai ga runtsawa ba korarin Bello da ya zo ya na tashi na ne ya katse min baccin.

Yanda ya ke maganar ya na mai nuni izuwa gida ya sanya ni kara tsanar Baffa Mudi, kiri kiri ya nakasa yaro karamin dan kawai san mulki da san zuciya, ban san sanda na fara zubar da hawaye ba, shi kuwa Bello da yayi tunanin sakon da ya isar min ne ya sa ni hawaye tuni ya fara kokarin lallashina, ya na mai dafa kafada ta, kafin daga bisani ya fara jan hannu na.

Sai a sannan na fahimta lalle akai wani abun tashin hankali da ke faruwa a gida, da sauri na tashi, ko silifa ban saka ba. Bello na janye da hannu na mu ka isa gida. Mutane ne fal bakin kofar gidan wasu na alwala wasu kuma tabarma su ke shimfidawa, ganin Baffa zaune dirshen a kasa ga Tanko gefe ya na matsar kwalla, jama’a na ta min sannu da sai hakuri ya sanya na karasa cikin gidan da sauri.

Cikin gidan ma tashin hankali na tarar, kuka da kurarin mata ne ke tashi, haka ina tsallake mata na isa ga bukkar Iya ta, Nan na iyi idu biyu da gawar Cangwai kwance, gefe kuwa Iya ta ce ri?e da jinjirar da ta haifa, cikin dare rai yayi halin sa bayan ta haifi diyar ta mace. Kalaman Cangwai ke dawo min sanda ta ke rokan karda na halaka ta, za ta hade kayan ta tabar Rugar Shehu ba za ta sake dawowa ba, ?ana sanin barin ta ita kadai da tsohon ciki ya mamaye ni, haka tsananin tsanan Baffa Mudi da shi kan sa mulkin da ya ke kwadayi har ya kai ga saka diyar shi cikin halak.

Bayan an shirya Cangwai ana shirin a fito da ita, sai ga Baffa Mudi ya shigo, ya nemi a bar masa gawar zai gana da ita kafin a fito da ita. Tun da ya kebe da gawar hankali na ya kasa kwanciya. Ya dan jima ciki kafin ya fito ya ce za a iya fito da ita.

Hankali na ya kasa kwanciya dan haka, kafin a kai da fito da ita na ce da su su dakata, Iyar Cangwai ta ce ban isa ba, tun dazu me ya hana na zo na mu yi sallamar karshe sai yanzu? Iya ta da sauran kishiyoyin ta ne su ka sa baki, haka ba a san ran Iyar Cangwai ba na shiga dakin. Ranar na yi abin da ban taba tsammanin zan iya ba, Yanda gaba na ke faduwa da hawayen da ke kwaranya daga idanuna be sa na fasa kunce suturar da aka yiwa Cangwai ba, hannun ta na hagu na yi arba da wani abu dunkule an daure shi da bakin kyalle, na yi sauri na sunce, daga waje ina jiyo Iyar ta na kuka da kururuwan na ki fitowa a tafi a rufe Cangwai.

Cikin azama na tura abun cikin wandan saki na, hakan yayi daidai da shigowar Iya ta, ganin na bude Cangwai ta hau ni da fada, tare da taimakon ta mu ka yi sauri mu ka rufe ta, cikin kankanin lokaci aka sallace ta, mu ka je aka rufe ta.

Cikin dare na sami Iya ta zaune dakin ta rike da jinjirar da Cangwai ta bari, ganina ta yi yunkurin bani yarinyar, Amma na ki karba. Hakan ba karamin tunzura Iya ta yayi ba, a zatan ta zafin mutuwar Cangwai ya sa na tsani jinjirar da ta bari. Nan kuwa kwashe komai na sheda mata, har da abinda aka kunsa hannun gawar Cangwai.

Mamaki da takaici ne ya rufe iya ta, kuka ta ke cike da takaicin zaluncin da aka yiwa Bello. Tare mu ka kunce abin da na ciro daga hannun gawar Cangwai, laya ce mai dauke da sunana da sunan baro baro da rubutun ajimi, an rubuta

“Kamar yanda gawar nan ta bar duniya, haka za ka bace a doran kasa Usman , kamar yanda wanan gawar ta ba za ta taba shakar iskar duniya ba, haka kai ma na za ka taba zama Shehun Rugar Shehu ba Usman”

Ko da na gama karantawa Iya ta ba karamin tashin hankali da rudani ta shiga ba, da kyar na samu na kwantar mata da hankali, na kuma umarce ta da kar ta shedawa Mahaifina halin da ake ciki, ta bari mu sami mafita a tsakanin mu, dan kuwa halin da Baffa Mudi ya nuna zai aikata komai dan ya cima burin shi na san rai da san duniya.

A wannan daren Iya ta ta yanke hukuncin da ya sa yayi sanadin bari na gida har na ke zaune tare da ku a yau, Iya ta ta umarce ni da na sakarwa Baffa Mudi Shehuntakar Rugar Shehu, ta Umarce ni da tunda a nashi tunanin ya birne gawar diyar sa da surkullen watsa ni uwa duniya, matukar ya ga ban tafi ba zai fahimci asirin sa ya tonu, ya kuma cigaba da kulla zalunci har ya kai ga cin nasara, da na bi uwa duniya ba a cikin hayyaci ba, gwara na tafi da niyar neman ilimi, dan haka ta na so na hada kaya na, na shiga arewacin Nigeria, duk gidan da na ga Malami na tabbatar na nemi ilimi daga gare shi, haka kuma duk sanda na canza sheka na sami hanyar sanar da ita ko da kuwa hakan ya na nufin ziyartar ta ta shigar batda kama, ita kuma muddin ta san in da na ke za ta turo min Bello duk sanda bukatar haka ya taso. Ina ji ina gani haka ta hade kaya na, ba tare da na yiwa Mahaifina sallama ba na baro Rugar Shehu na shiga uwa duniya…”

Usman ya nisa, ya na mai duba Malam ya kara da

“Hakan ba karamin ciwo ya yiwa Mahaifina ba, a tunanin shi mutuwar Cangwai ya sa na bi uwa duniya, tun ya na cigiya har ya sadakar ya fawwalawa Allah. Shekara goma sha biyu kenan da barin Rugar Shehu, kamar yanda Iya ta ta umarce ni, na kan ziyarce ta duk sanda na sami dama cikin bat da kama, haka kuma duk in da na ke tana da masaniya akai, ina barin mata bayanin wajan a rubuce, ta kan aiko Bello duk sanda bukatar haka ta taso. Allah yayiwa Mahaifina rasuwa bayan shekara uku da barin Rugar, yanzu haka Baffa Mudi ne Shehun Rugar”

Usman ya kare maganar cikin kewar Iyar sa da bakin cikin mahaifin sa ba tare da sun samu sun gana ba. Gaba daya falon babu wanda be tausayawa Usman ba, Musammam Halitta wacce har hawaye ta zubar saboda hakan. Cikin jimami Malam ya nisa ya ce

“Da farko dai ina ma ka ta’aziyar rashin mahaifin ka, da kuma matar ka. Ba kai kadai ka ci amana ta ba, hatta yar ciki na ta ci amana ta, idan kuwa haka ne na yafe ma ka duniya da lahira……”

Karar wayar Malam ne ya katse maganar da ya ke, ko da Malam ya duba ya ga makocin sa kuma daya daga cikin amintattun abokan sa ne Alhaji Sidi, ya daga wayar, bayan sun gaisa ya ce da shi ya jira ana zuwa. Bayan da ya aje wayar ya umarci Jauro ya je ya budewa Alhaji Sidi gate, ya shigo da shi ciki. Cikin himma Jauro ya fita, in da Malam ya dakata da jawabin shi har lokacin da Jauro ya shigo biye da shi Alhaji Sidi tafe.

Alhaji Sidi na mai bawa Malam hannu yayinda ya zauna kusa da Malam ya ke tambayar abin da ke faruwa cikin al’ajabi, Da safiyar nan ya ji dan sa ya shigo da wani labari hakan nan babu dadin ji, wai an kama wata yarinya ta na haurowa daga gidan Malam, shin menene gaskiyar maganar?

Murmushin yake ne ya maye fuskar Malam, hannun sa cikin na Alhaji Sidi ya ce

“Zan ma ka bayani Alhaji Sidi, Amma kafin nan na ji dadin zuwan ka har rai na, domin kuwa ina da bukatar shedu, zuwan ka ya cika min shedun na ke bukata”

“Shedu? Na me kuma Malam?”

Alhaji Sidi ya tamabaya cike da mamaki.

“Kar ka damu Alhaji, a sannu za ka fahimci komai, ina kai Usman matso nan kusa da ni”

Cikin shakku Usman ya taso ya zauna gaban Malam in da ya nuna masa. Malam na mai dafa kafadar sa ya ce

“Usman a daren jiya ka yi min abinda babu wani mahaluki da ya taba yi min cikin duniyar nan, ka rufa min asirin da diyar cikina ta so tona min a duniya, ba zan yi butulci akan jarabawar Allah ba, Allah ya jarabci annabin sa, annabi Nuhu AS ta hanyar dan sa, sa bare ni da ba ko wan kowa ba, Amma akwai alfarma daya da na ke so ka min….”

Ya karasa maganar ya na mai duban Usman. Cikin girmamawa da kaskantar da kai Usman ya ce

“Malam duk abinda ka ke so ni mai yi maka ne, wanda ya ba ka ilimi nan duniya ai ya ma ka komai”

Cikin jin dadin amasar da Usman ya ba shi Malam ya ce

“Ina so ka taimaka ka auri diya ta Zainab…”

A firgice Usman ya dago ya kalli Malam, haka ma Halitta da su Ammy, gaba daya falon babu wanda be girgiza da maganar Malam ba, Zainab kuwa ji ta yi gaba daya dodon kunnan ta ya toshe tsabagen yanda maganar ta doki kunnan ta. Cikin in’ina Usman ya furta

“Ma…l..am”

Alhaji Sidi kuwa mamaki ne ya sanya shi furta

“Me ke faruwa haka? Wata Zainab ka ke nufi ne haka?”

“Diya ta ta ciki na, ka ga wannan bawan Allah da ke zaune gaba na? Shi ne kadai zai iya rayuwar aure da waccar yarinyar asiri na ya rufu, dan kuwa ya rufa min asiri a yau fiye da tunanin ka! Wannan dalilin ya sa na yanke hukuncin daura ma sa ita ta zame masa halak malak ko mutuwa na yi na san na fita hakkin ta”

Jin haka tuni Zainab ta fashe da kuka mai tsuma zuciya, fadi ta ke

“Dan Allah Dady ka yafe min kar ka yanke wannan danyan hukuncin a kai na, dan Allah Ammy ki sa baki, dan Allah Halitta ku taimaka min, Alhaji ku sa baki”

Hawaye ke zuba daga idanun Halitta daya na bin daya, kiri kiri ta na ganin mahaifin ta na shirin mata yankar kauna tsakanin ta da masoyi abin kaunar ta. Cike da kishi Jauro ke duban Usman, da ya san Malam zai yanke hukuncin haka da shi ma ya ce Zainab matar shi ce, yanzu gashi Usman da ya zo ya tarar da su cikin gidan ya sami garabasa kara zube.

“Malam dan Allah kada ka yanke hukunci cikin gaggawa haka, Yakura jinin ka ce, kada ka bata rayuwar Yakura”

Ammy ce ke magana cikin magiya. Idan Malam ya ji Ammy toh sam be nuna alamun da shi ta ke ba. Ya na duban Usman ya ce

“Kai na ke tsimayi Usman, shin ka karba? Za ka iya auren diya ta?”

A hankali ya daga idanu ya kai kallan sa ga Zainab wacce ta ke kuka mai fitar da sauti, har ga Allah be taba jin wani abu na so game da ita ba, bare yayi tunanin aure zai shiga tsakanin su. Yanda ta ke kallan sa ne ya sa shi saurin kau da kai gefe

“Usman?”

Malam ya kira sunan sa da kakkausar murya.

“Na’am Malam, na yarda na amince, sai dai matsalar abu biyu ne”

“Ina sauraran ka Usman”

“Banda kudin sadaki, haka kuma banda muhallin da zan iya aje mata Malam”

Jin haka Malam ya dara tare da fadin

“In dai wannan ne matsalar ka toh Alhamdulillah, na tabbatar ka haddace Riyaadul Saliheen?”

Cike da girmamawa ya gyada kai alamar eh.

“Toh Alhamdulillah, na yanke maka wannan littafin a matsayin sadakin Zainab, ina so ka koyar da ita wannan littafai, batun muhalli kuma ga BQ nan babu kowa da ciki, zan sa a gyara maka ku zauna, Allah bashi idan ka yi na ka sai ku tashi ku koma can ko?”

Baki bude Ammy ta ke duban Malam har ya kare jawabin sa, ba ta taba tunanin Malam zai iya kaiwa matuka wajan wulakanta ta da yaran ta ba sa sai a yanzu.

“Innalillahi wainnailaihi rajiun yau! Innalillahi wainnailaihi rajiun! Innalillahi wainnailaihi rajiun!”

Salatin da Zainab ke yi kenan cikin kuka, dan kuwa ji ta ke kamar rayuwar ta ce ta zo karshe. Halitta ma kukan ta ke haka ma Falmat wacce tausayin yar uwar ta ya maye zuciyar ta. Alhaji Sidi na mai gyaran murya ya ce

“Malam ran ka a bace ya ke, ka tuna yanke hukunci cikin fushi…..”

Hannu Malam ya daga masa, ganin haka Alhaji Sidi yayi shiru. Kana Malam ya ce

“Malam Usman dama kai namiji ne, kai kan ka mai kar?a ma kanka aure ne a kaidar shari’a ka isa ka karbarwa kan ka aure, ga shedu uku nan, Jauro, Isa da kuma abokina Alhaji Sidi, dan haka idan ka shirya sai a hanzar ta a daura auren ko?”

Kai Usman ya gyada abun ya zo masa kamar almara. Haka kuwa Zainab ta na ji ta na gani Malam ya daura mata aure da Usman, akan sa dakin koyar da ita littafin Riyaadul saliheen. Ana shafa fatiha Zainab ta zube mu su nan sumammiya.Auren Shehu

11

 

Ganin Zainab a sume da kururuwan kukan su Ammy sam be sa Malam ya motsa ba. Alhaji Sidi ne ma ya kawo doki ya na mai umartar Usman yayi maza ya dauko ruwa daga cikin fridge din Parlour. Ammy da Falmat ne ke jijjiga kafadun ta, Halitta kuwa kasa motsawa ta yi, hukuncin da Malam ya yanke ba Zainab yayiwa ba, gani ta ke tamkar ita Malam yayiwa gwale gwale, ta na ji ta na gani wanda ta ke so, ta ke kauna ya zamanto miji ga yayar ta uwa daya uba daya.

Yayyafin ruwan sanyin da ya sauka fuskar ta ya sanya ta farfadowa, a hankali ta bude idanun ta.

“Alhamdulillah, Malam ta farfado ka yiwa Allah ka warware auren nan, Alhaji Sidi ka sa ba ki!”

Ammy ke magana cikin magajiya ta na mai rungumo Zainab wacce ta ke ji kan ta na sarawa tsabagen ciwon da ya ke ma ta. Maganar da Ammy ta ke yi ne ya sa ta farga ta tuna da halin da ta ke ciki, kuka ta saki mai tsuma zuciya ta na fadin

“Dan Allah Dady na tuba, ba zan kara ba, Dan Allah Dady kar ka daura min wannan nauyin a kai na Dady!”

Idan dutse na motsi toh Malam ya motsa, ko nunawa ya san da shi ta ke bare ya amsa mata be yi ba. Usman wanda kamar yanda Zainab ke kukan bakin ciki shi ma har ga Allah wannan auren da aka daura ma sa be so ba, shi ya fara zamewa ya fice daga parlour, Jauro da Isa su ka bi bayan shi. Ammy kuwa Alhaji Sidi ne ya ce su dan ba shi wuri su zanta da Malam in Sha Allah za a sami mafita. Zainab kwance jikin Ammy kamar mai jinya haka su ka fice ya rage daga Malam sai Alhaji Sidi.

Alhaji na duban Malam ya ce

“Malam kai fa mai sani ne, ka sani cewa yanke hukunci cikin fushi da gaggawa na tare da dimbin danasani, shin me wannan yarinyar ta aikata da har za ka yanke wannan hukuncin mai nauyi akan ta Malam?”

Ga mamakin Alhaji Sidi sai ga Malam ya na zubda hawaye.

“Ya hayyu ya qayyum! Munin abun ya kai haka?”

Cewar Alhaji Sidi cikin alajabi. Kai Malam ya girgiza, kana ya ce

“Alhaji Sidi ka na daya daga cikin amintattuna na, abokin arziki da amana, Alhaji Sidi ba zan boye ma ka komai ba. Na kasance mai rauni aka ‘ya’ya, musammam ma Zainab. Allah ya jarabce ni da diya, sai dai na ce Alhamdulillah. Amma Zainab ba ta min adalci ba, ina nan idanuna kan ‘ya’yan wasu, Wai ni Malami mai wa’azi ashe tawa diyar wacce na fi yarda da ita ta nan ta na barna a bayan ido na, Innalillahi wainnailaihi rajiun…..!”

Nan Malam ya kwashe komai ya fadawa Alhaji Sidi, ya kare maganar da

“Yaron da zai kare mutunci na haka, wanda zai rufa min asiri haka me zai hana na bashi ita? Yanda ya ke da kyawawan halayya ina kyautata zaton idan har Zainab ta zauna karkashin sa, ta nemi wannan gatan ta take da shi ta rasa za ta nutsu Alhaji Sidi, haka kuma Na yi imanin Usman zai ruke ta da amana”

Cikin jimami Alhaji Sidi ke jinjina kai, kana ya nisa tare da fadin

“Innalillahi wainnailaihi rajiun! Zainab ba ta kyauta ba, duk da dai har da sakacin ka Malam, ai ba a shedar dan yau Malam, ka yarda da Zainab da yawa, haka kuma Hajiya ta yi sakaci duk dai rabin rayuwar yarinyar nan ba a gida ta ke yi ba, Amma da ana bibiyan ta duk sanda ta dawo da duk wannan masifar ba ta afku ba Malam, yardar ta yi yawa, sakacin yayi yawa!”

“Ka duba yanda na tsani kare Alhaji Sidi, har karnuka na debo na sa a gidan nan tun sanda mu ka fara zargin ana hauro mana gida, ashe dai tawa karyar ta gida ce……”

“Waiyazubillah!”

Alhaji Sidi ya katse Malam cikin hanzari, be gushe ba ya kara da

“Ka kausasa harshe da yawa Malam, Amma wani hanzari ba gudu ba, yarinyar nan haura katanga ta ke, ta na fita yawan dare, shin ka tambaye ta ina ta ke zuwa? Shin iya ka yawan abun ya tsaya? Ta na nan matsayin ta na budurwa ko kuwa dai istibiraqi ya hau kan ta?”

“Diya ta ba mazinaciya ba ce! Na yi imani diya ta ba za ta aikata zina ba kamar yanda ni ma ban taba aikata zina ba ”

Malam ya bashi amsa kai tsaye. Kai Alhaji Sidi ya dafe, cikin nuna bacin rai ya ce

“Ga ba irin ta ba! Ka na shedar gaibu kai tsaye! Ka taba tunanin Zainab za ta iya tsayuwa da wani da namiji? Bare kuma har ta na yawan dare? Amma yanzu ina gari ya waye? Haba Malam ya ka na Malami kana da sani ka ke ta ke sanin haka?”

Shiru ne ya biyu baya na dan wani lokaci, sannan Alhaji Sidi ya ce

“Na sani Malam, it’s not easy, shi ya sa na ce ma ka kada ka yanke hukunci cikin fushi, Dan kuwa matukar yarinyar nan akwai istibiraqi kan ta auren nan sai an warware shi…..”

“Idan kuma babu wallahilazim sai ta zauna da mijin ta matukar ba shi da bakin sa ya sake ta ba”

Ajiyar zuciya Alhaji Sidi ya saki, kana ya ce

“Idan har auren be sabawa addinin musulunci ba, be saba shari’a ba ai aure kam ka daura shi Malam”

Kai Malam ya jinjina cikin gamsuwa, Amma har ga Allah ba ya fatan wargatsewar auren Zainab da Usman, har lokacin be yi dana sani ba, ba kuma zai yi dana sani ba, da wannan kudirin su ka yi sallama da Alhaji Sidi. Maimakon ya kira Zainab kamar yanda yayiwa Alhaji Sidi alkawari, sai ya kiran kiran su Jauro yayi ya ba su umarnin su taya Usman a kwashe kayan BQ gaba daya a gyarawa Zainab da Usman dan kuwa a ranar za ta tare dakin mijin ta.

Ganin yanda su Isa su ke kai kawo hauka ne kawai Zainab ba ta yi ba. Hatta wayar ta da ta addabe ta da kara ganin Mike ne ke damun ta ba ta san sanda ta doka shi kasa ba, screen ya fashe. Halitta kuwa tun da su ka baro wajan Malam ta shige dakin ta ta kulle, kuka ta yi sosai kamar ran ta zai fita, duk da ba ta taba tunanin samin Usman a matsayin miji ba, Amma kasancewar shi mijin yar uwar ta abu ne mai ciwo a gare ta. Sam Ammy ba ta damu da halin da Halitta ta ke ciki ba, a tunanin ta halin abin da ya faru da Zainab ne ya sanya ta halin da ta ke ciki. Yan uwan Malam na jiki da kuma na ta yan uwan da su ke ta kira ta saka mu su kuka, cewar ta su kawo mu su doki Malam ya bayar da auren Yakura ga Maigadi, auren ma na sadaka ba tare da sadaki ba. Haka su ka ringa kiran Malam ya na gani ya ki dauka, karshe ma kashe wayan yayi gaba daya. Haka kuma ya ki sauraran ta bare su yi magana, tun ta na kuka har ta koma fada fada, ta na cewa Malam ya tsane ta ya tsani yayan ta shi ya sa ya mata wannan wulakancin.

Kafin azahar ta yi su Usman su ka gama gyaran BQ tas, dama kanana dakuna ne guda biyu, sai dan karamin kitchen da bandaki. Tun da su ka fara aiki Jauro ke jifan Usman da Habaici, bini bini ka ji ya ce

“Dan cirani an zama dan masu gida, an bar daji an zo birne ana mana surkulle”

Ko kuma ya ce

“Kai da na sani ni ma na yi kanzagi wajan neman suna da fa Malam ya dauran mata….”

Usaman na jin shi amma ya masa banza dan kuwa idan akwai abun da ya dami kwakwalwar sa ya bi bayan auren Zainab da aka daura masa, har ga Allah be da niyar kara aure saboda yanda auren shi da Cangwai ya kaya, bare kuma Malam ya aura masa mace wayayyiya, yar birni kuma yar boko kamar Zainab, shin ya rayuwar shi da Zainab zai kasance? Da wani idanu zai dubi Malam ya roke shi da ya sauwake masa wannan nauyi da ya dora masa?

Da wannan tunanin a ran sa ya wuni, dan kuwa ranar sam be sami kwanciyar hankali ba bare har ya samu ya kai lomar abinci bakin salati. Bayan la’asar Malam ya nemi ganin Usman a falon sa, Nan ma Jauro ya fara

“Dan masu gida sirikin Malam, an baka mata an baka wajen zama, maza je ka kila abin hawa kuma za a baka, kai ya kamata ka mu sirrin wannan surkullen na ka!”

Usman be kula shi ba ya wuce falon Malam. Sanye ya ke cikin rigar sakin shi fara, da bakin wando, fuskarsa rufe da farin rawani. Ganin takalma a waje ya sanya shi sallama tare da tsayawa daga waje. Malam ne ya amsa masa sallam sannan ya ba shi izinin shigowa.

Ganin ta zaune tare da Halitta sai da gaban shi fadi, badan komai ba sai dan yanda dukan su biyun su ka zuba masa idanun su da ya yi jajur kai ka ce mutuwa aka mu su, in da Halitta ke kallan sa cike da kewa, so da kauna, Zainab kuwa tsantsan tsana ne cikin na ta idanun, dan kuwa nan duniya idan akwai wanda ta tsana ya bi bayan Usman, wanda a yanzu haka shi ne mijin ta.

Da sauri ya kawar da kai gefe ya sami waje can baya ya na shirin zama Malam ya ce ya motso kusa da shi ya zauna. Cike da jin nauyi ya matsa gaban Malam wanda ke zaune kan doguwar kujera.

Malam na daga zaune ya ke kare mu su kallo, Halitta sanye cikin bakar abaya, kan ta nade da mayafin, Abin ku da farar mace har wani jaja fuskarta ta yi tsabagen kukan da ta sha. Shi kan shi Malam yayi mamakin damuwar da Halitta ta shiga sanadiyar hukuncin da ya yanke na auran yayar ta. Zainab kuwa Hijabin jikin ta har jirwaye yayi tsabagen hawaye da majinar da ya sha. Daci rai da bakin ciki ya sanya shi saurin dauke kai daga kallan Zainab yayinda ya furta

“Na yanke hukunci cikin gaggawa ba tare da na tambayi abu mai muhimmanci na game da shiri’ar musulunci ba sai da Alhaji Sidi ya nusar dani, ka sani Usman ko kadan ban yi danasanin daura ma ka diya ta da na yi….”

Jin haka wani sanyi ne ya ziyarci zuciyar Zainab, a tunanin ta Allah ya amsa adduar ta, Malam zai saka Usman ya sauwake mata igiya ukun da Malam daure ta da shi. Malam be gushe ba ya cigaba da fadin

” akwai tambaya mai muhimmanci da ya kamata na yi mata kafin na daura ma ka ita, kuma zan yi mata shi gaban ka tun da tsakanin mu da kai babu boye boye, amsar da za ta bani shi zai bani haske akan tarewar ka da ita ko kishiyar haka…”

Usman na mai dukar da kai cikin fatan Allah ya warware masa wannan nauyi da aka daura masa ya furta

“Na’am”

Zainab ba ta ankara ba sai ji ta yi Malam ya kira sunan ta da kakkausar murya ya na mai fadin

“Zainab ki duba girman Allah, tsakanin ki da Allah ki kin taba aikata zina? Yaushe ne ranar karshe da ki ka aikata?”

“Innalillahi wainnailaihi rajiun!”
Cewar Zainab hannun ta biyu ta sa ta toshe bakin ta tsananin kukan da ya ci karfin ta. Ita kan ta Halitta tambayar ta mata tsauri da bazata, shi kuwa Usman kan sa sunkuye ya na jiran amsar da zai iya zama mafita a rayuwar sa.

“Ke dallah rufa mana baki! Ki amsa min tambaya yanzu yanzu shasha kawai! Ba kya yawo ne? Idan ke kamila ce kamar yanda na yi tunani a da me zai sa na mi ki wannan tambayar? Ko za ki ce min ba ki taba kusantar zina ba idan har ma ba ki aikatawa ba!”

Malam ya fada a fusace, hakan ya sanya Zainab saurin fadin

“Wallahi dadi na rantse da Allah ban taba aikata zina ba Daddy, Daddy wallahi iyakaci na club, shi ma na maka alkawari ba zan kara zuwa ba Daddy….”

“Diya ta ni Birma a club!”

Malam ya katse ta cike da takaici. Zainab ta kara da

“Daddy idan har ka aurar da ni ga Sudais zan kasance mace ta gari a gare shi, Daddy ban taba zina ba Daddy, Daddy dan Allah ka sa ya sake ni, Daddy na tuba…..”

Wani sanyi ne ya ziyarci zuciyar Malam, dan kuwa shi kan shi ya san da Zainab mazinaciya ce tabbas zai iya hadiyar zuciya ya mutu. Ya na mai godiya ga Allah da iya club din ya tsaya, ya ce

“Bakin alkalami ya bushe, Usman shi ne mijin ki, auren shi ya tabbata akan ki….”

Kukan Zainab be sa Malam ya tausaya mata ba, idanun sa kan Usman ya ce

“Usman ga ta nan halak din ka ce, ci, sha da suturar ta ya rataya hannun ka, dan Allah ka kasance mai adalci, Zainab amana ce gun ka, na ba ka ita amana ko bayan rai na, kamin alkawarin duk runtsi duk wuya ba za ka sake ta ba, dan Allah Usman…..”

“Malam ba sai ka roke ni ba, Na daukar maka alkawari, Zan ruke ta amana, Na dau maka alkawari matukar ba a shiga hakkin Allah ba, ba zan taba sakin ta ba”
Jin alkawarin da Usman ya daukarwa Malam kamar wuka ya ke daba mata a kahon zuciyar, wasu zafafa hawaye ne ke zuba daga idaniyar ta tamkar wuta. Malam na duban Halitta wacce ita ma din hawaye ne ke kwaranya daga idanun ta jin alkawarin da Malam ya sa Usman ya dauka, Malam ya ce

“Halitta na yanke hukuncin ba da auren ki ga Sudais amadadin yar uwar ki, in Sha Allah kamar yanda mu ka tsara shabiyu ga wata juli zai kasance ranar daurin auren ki”

Da dashasshiyar muryar ta Halitta ta amsawa Malam da

“Toh Daddy, na yi biyayya”

“Allah ya mi ki albarka”

Halitta ta amsa da amin, kafin ya mayar da kallan sa ga Zainab wacce jin za a daurawa Halitta Sudais ba karamin bakin ciki ne ya kara taruwa cikin zuciyar ta ba. Gani ta ke Malam ya tsane ta cikin ‘ya’yan sa ya aurar da ita ga Mai gadi, gashi zai aurar da Halitta ga dan abokin sa. Ba ta kara sarewa da Malam na sai da ta ji ya ce

“Usman sai matar ka ta hado na ta ya nata ku tare can BQ da na tanadar mu ku ko? Da ga yau kada ta sake kwanan min cikin gida, ki kwana dakin mijin ki, na sallame ki har abada”

Daga Usman har Zainab Malam su ke kallo, ganin babu alamar sassauci a fuskar sa ya sanya Usman kallan Zainab, kamar yanda yayi imani zai mutu haka ya tabbatar da tashin hankalin da ke tattare da Zainab.

 

18

 

Anty Sauda na Mai duban Zainab ta ce

“Yakura ni fa ganin yanda wannan ke kwance rai a hannun Allah gwara a sake shi kafin ya mace mu su a nan”

Cikin nuna rashin tausayin Muhamad Bello Zainab ta zunbura baki tare da fadin

” A sake shi? Idan aka sake shi sai a je a dauko shi almajirin ko Anty Sauda? Wallahi ni auren nan gaba ?aya na tsana har rai na!”

“Ah ah ba sai an dauko shi ba, wannan horon da aka yiwa dan uwan sa ma ya isa ya sake ki muddin ya na da hankali”

Cewar Anty Sauda, ba ta gushe ba ta kara da
“Su dauke shi yanda ya ke su kai mayar da shi Kano…”

“Anty Sauda……”

Zainab ta katse ta cike da damuwa. Murmusawa Anty Sauda ta yi, ba ta gushe ba ta kara da
“In dai almajirin nan ne wallahi sai ya sake ki, yanzu dai a mayar da wannan kada ashahadun mutuwar shi ya rataya kan mu!”

Haka ba a son ran Zainab ba ta na ji ta na gani kafin su tafi, Anty Sauda ta ba da umarni a mayar da Bello Kano gidan Malam in da aka dauko shi.

A ranar aka wuce da Bello Kano, hajaran majaran, gaban gidan Malam su ka ajiye shi a wulakance, su ka juya su ka yi tafiyar su. Hayaniyar mutane ne ya sanya su Jauro bude kofa, ganin mutane sun yi cincirindon ya sa Jauro kutsawa cikin su domin ganewa idunun sa abin da ke faruwa, masu salati na yi, ma su Allah wadar da kasar nan na yi.

Kallo daya Jauro ya masa ya san ko shakka babu wannan bafulatani na da dangantaka Usman, dan haka da sauri ya koma ya yi kiran Usman, wanda jin abinda kr faruwa ya sanya shi fitowa kafa ko takalmi babu.

“Innalillahi wainnailaihi rajiun! Bello? Bello!!!”

Cewar Usman yayinda idanun sa su ka sauka kan Bello. Tuni idanun sa su ka kada su ka yi jajur tamkar garwashi, cikin kankanin lokaci gaba daya ya sauya kamanni. Tsugunnawa yayi gaban sa tare da daura hannu bisa kirjin Bello, jin ya na bugawa be tsaya bata lokaci ba ya dauke shi cak ya daura a bisa kafada, Haka kafa babu takalmi, Isa biye da shi su ka dauki hanyar da zai sada su da titi, Allah ya so kafin su karasa sai ga dan sahu, Isa ne ya tsayar mu su da shi, su ka shige, Usman na mai umartar dan sahu ya kai su asibiti mafi kusa.

Sun je asibitoci ya kai biyar, Amma duka sun ki karbar su, cewar su halin da Bello ya ke ciki ya kamata su zo da police report. Da kyar su ka samu aka karbe su wani karamin private hospital da ke cikin Tarauni, me suna Iklima Clinic, su ma din sai da Isa ya koma ya hado gaba daya abin da ya mallaka na kudi tare da wanda Usman ke da shi, su ka ba su sannan su ka yarda aka ba su gado, likita ya shiga duba Muhamadu Bello.

Bayan wasu mintina Likita ya fito, Nan ya ke yiwa su Usman bayanin yanayi yunwa da kishin ruwa da Bello ya ke ciki, bayan haka ga dukkan alamu an bashi kashi sosai, jikin sa zane ya ke da alamun shatin belt. Allah ya sa be sami karaya ba ko daya ba.

“Yanzu likita ya za a yi? Dan Allah ka taimaka ka ceto ran dan uwana”

Cewar Usman, cikin ran sa ya na mai cin alwashin ramuwar gayya ga duk wanda ya aikatawa Bello tsananin azaba haka, ko da kuwa wanene.

“Ka da ka damu, in Sha Allah za mu yi iyakar kokarin mu”

Cewar likita, wanda tun shigowar Usman Allah ya dora masa tausayin sa, musammam ganin yanda hankalin Usman ya tashi akan abin da ya sami Bello.

In da Usman ke zirga zirgan nemawa Bello lafiya, Zainab kuma a na ta bangaran tunanin yanda za ta kawo karshen auren ta da Usman ta ke, dan kuwa yanda ta ga ana maganar auren Halitta Sudais ba karamin daga mata hankali ya ke ba. Gashi duk wani dabarar da za ta ja hankalin Sudais ta yi, Amma ina kamar ta shuka dusa dan kuwa dai ha?onta ya kasa cimma ruwa.

Bayan sati ?aya da sakin Muhammad Bello Anty Sauda ta zo gidan Malam. Ta yi rashin sa’a Ammy ba ta nan, Halitta da Falmat sun raka ta asibiti a gwada jinin ta, dan ta na yawan fama da ciwon kai. Zainab ce ta saka Anty Sauda gaba a kan auren ta da Usman. Cike da Mamaki Anty Sauda ta ce

“Wai ke wannan saurin ina zai kai ki ne? Na ga ke kan ki makaranta za ki koma, ki fita harkar almajirin nan, ki hada na ki ya na ki ki koma makaranta, duk ran da ya gaji zai sake ki, Ni na san bayan abin da ya faru da dan uwan sa zai sake ki Yakura, dolen sa ma”

Zainab na kallan Anty Sauda ta kada baki ta ce

“Anty Sauda idan kuma na sami mijin aure fa? Shikenan ina ji ina gani sai na bari ya wuce ni?”

“Ina ki ka taba jin mijin wata ya wuce ta?ai matar mutum kabarin sa, toh tunda abin haka ne bari Hajja Aleesha ta dawo sai ki fada mana dan gidan wanene, in ya so duk yanda za a yi almajiri ya sake ki sai a yi, wancan din ya fito a hada auren da na Halitta”

Cewar Anty Sauda hankali kwance. Kamar daga sama ta ji Zainab ta ce

“Ba fa kowa ba ne face Sudais, dama ni Dady ya ce zai daurawa tun farko, kuma dani ya fi dacewa……”

“Zancen banza zancen hofi!”

Ammy ce ta katse ta a fusace, dawowar su kenan biye da ita Falmat da Halitta ne. Idan aka dauke Halitta babu wanda be tsorata da furucin Zainab ba. Ammy ba ta gushe ba ta kara da

“Wannan bakin hali na ki Yakura ba guna ki ka dauka ba, haka kuma ba halin Malam ba ne….!”

“Akwai bakin Hali da ya wuce na shalelen ta ki Halitta? Ace ta rasa wanda za ta yiwa hassada da bakin ciki sai yar uwar ta wacce ta sha nono ta sakar mata? Yarinya bakin hali kamar cinnaka ai muna sane da duk wani tuggu da ta ke shiryawa Yakura a gidan nan!”

Anty Sauda ce ta ara ta yafa ta na mai watsawa Halitta wacce ta bude baki ta na kallan ta harara. Jin haka Ammy ta sami waje ta zauna, murya kasa kasa ta ce

“In akwai wacce ta ke cinnaka kaf gidan nan Yakura ce! Ita da kan ta take kullawa kan ta koma menene! Nan ai ita aka ce za a aurawa Sudais din ta nuna mana iyakar mu ta hanyar haurawa katanga, haka Halitta ta na ji ta na gani Malam ya musayan ta a madadin Yakura, ta masa biyayya, komai na tafiya dai dai sai ta zo mana da yashesahen zance? Wallahi ko ita ce sarkin shedanun duniya ta yi kadan!”

Zainab na mai zunburo baki, cikin neman doki ta ke duban Anty Sauda, wacce gaba daya ita ma din jikin ta ne yayi sanyi. Kai ta girgiza ta ce

“Ah ah Yakura, kin yi kuskure nan kam, Ni ma ba zan goyi bayan ki a nan ba, Kuma na ji wannan yaron na kaunar yar uwar ki…”

“Ita fa ba ta son shi, wannan almajirin da Dady ya daura min ta ke so! Ku tambaye ta mana!”

Shiru ne ya biyo baya yayinda Halitta ke duban Zainab cike da mamakin halin ta.

“Karya ki ke mata!”

Cewar Ammy bayan ta farfado daga rudanin da ta shiga, ba ta gushe ba ta kara da

“Karya ki ke ma ta, ke ko ma da gaske ki ke wallahilazim ba za ki auri yaron nan ba, matukar ina raye Halitta za a daura masa, idan kin so ki kashe auren ki, ki zauna ba aure har a bada, kai Yakura haihuwar ki ko haihuwar asara……!”

“Kayya!! Kayya!! Na fa ce ki dena yiwa yarinyar nan baki”

Anty Sauda ta katse Ammy. Cike da jimami ta ce

“Toh ba dole ki sami hawan jini ba yanda ki ke daga hankalin ki aka abu kankani haka, kin fa san yarinta ke damun Yakura, Yakura yarinya ce har yanzu ba ta san ciwan kan ta ba. Kuma yaran nan fa duka na ki ne, ina laifi idan kin nusar da ita kin gyara ma ta Aleesha?”

” Yakura ba yarinya ba ce tunda har ta san bin maza da busa hayaki! Babu wani nusar da ita da zan yi akan wannan maganar, magana daya ce dal, aure ne dai sai an daura shi tsakanin Sudais da Halitta da yardar Allah, na kuma sake jin kin furta wani abu akan auren nan wanda ya ke kishiyar alkhairi da zaman lafiyar Halitta wallahi sai na tsine mi ki Yakura! Tashi ki ba mu waje shashasha wacce ba ta san ciwan kan ta ba!!”

Zainab ta tashi fuuu, saura kiris ta buge Halitta Allah ya sa ta yi maza ta kauce mata daga hanya. Duk yanda Anty Sauda ta so Ammy ta huci zuciyar ta ta duba lamarin ki ta yi, ta ce babu wanda ya isa ya saba alkawarin da Malam ya dauka na auran Halitta da Sudais, aure ne an daura shi an gama da yardar Allah.

***

Muhamadu Bello kuwa sai da yayi sati a asibiti sannan ya dawo hayyacin sa. Duk yanda ya so ya bawa Usman amsar tambayoyin da ya ke ta jera masa kasawa yayi domin kuwa rashin lafiyar Iyar su ne kadai gaban sa.

“Iya…..Iya na kwance rai a hannun Allah, ita ta ce na yi maza na kira ka, ta ce lalle ka zo”

Ganin abin da Bello ya rubuta masa da rubutun ajami jikin takarda ya sanya Usman gigicewa.

“Me ya sami Iya? Tun yaushe ta aiko ka? Su waye su ka aikata ma ka wannan abun?”

Usman ya jera masa tambayoyi ya na duban Bello da ke zaune bisa gadon asibiti. Takardar ya dauka ya kara rubuta

“Kwana na nawa a kwance a nan?”

“Sati guda….”

“Innalillahi wainnailaihi rajiun! Mun bata lokaci da yawa Allah ya sa Iya na raye.”

“Ta na raye! Babu abin da zai sami Iya ta!”

Cewar Usman a fusace bayan ya karanta amsar da Bello ya bashi. Idanun sa ne su ka fiffito gani Bello ya rubuta

“Dama ka yi aure ne? Mutanen da su ka kama ni suna ta duka na wai sai na saki matar da aka daura min, sai da wasu su ka zo, ina jin su duk da ba na iya ko da kwakkwarar motsi ne, na ji sun ce ba ni ba ne, a nan na gane kai su ke nema…..”

Cikin zafin nama ya fizgi takardar, ya na mai kara dubawa da kyau yayinda idanun sa su ka yi jajur tsabagen bacin rai. A fusace ya mayar masa da takardar tare da fadin

“Ka fada min komai da komai! Me ya faru? Yaya mutanen su ke? A ina su ke?”

Ji yake ina ma Bello na da baki ya fada masa dan kuwa rubutun na Bello ya masa rashin sauri da yawa a yau. A haka Bello ya zayyana masa komai. Ran Usman yayi baki sosai, zuciyar shi ba karamin ?aci ta yi ba akan abin da Zainab ta sa aka aikatawa dan uwan sa. Lalle za ta ji a jikin ta, sai ta gwammaci ba ta zo duniya ba…. tunanin da yake a ran sa kenan kafin Bello ya sake rubuta masa wata tambayar

“Wacece ita?”

“Sannin wacece ita be da muhummanci Bello! Ka huta idan ka sami sauki sosai zuwa gobe in Sha Allahu za mu tafi Rugar Shehu wajen Iya”

Ya na gama fadin haka ya fice. Shi kan shi Muhamadu Bello ya tsorata da ganin yanayin Usman, rokan shi Allah ya kiyaye kar ya aikata wani abun da za su zo su yi dana sani a gaba.

*****
Kamar yanda Usman ya fada, washaegari da sassafe aka sallami Bello. Bayan ya biya sauran kudin da ake bin su, ya dauki yan kayan sa tare da yiwa su Jauro sallama, ya sa Bello gaba su ka nufi Rugar Shehu duk da jikin Bello be yi kwari sosai ba.

Da yake Bus su ka shiga, ana ta tsaye tsaye ba su suka shiga rugar Shehu ba sai yamma likis. Tun da su ka nufi Rugar gaban Usman ke faduwa. Kafin su kai ga shiga rugar su ka fara kacibus da matasa da magidan ta wanda yawancin su dawowar su daga kiwo kenan, suna kada shanu gida, sanye su ke cikim kayan saki, wasu daga cikin matasan kitso ne kan su, wasun su kuma hular kaba ce bisa kan su, magidan tan ne ke sanye da hular saki.

Ganin Bello tare da wani mai kama da yayan sa ya sa kowa ya bar hidimar gaban sa, su ka tasan ma su. Ko da su ka karaso dab da su, su ka duba da kyau su ka ga Usman din ne ko shakka babu tuni matasa su ka dau sowa su na mai jefa gora sama suna cafewa suna mai zagaye Usman, cikin harshen fulatanci su ke fadin

“Maraba da magajin Rugar Shehu na kwarai! Ashe Rugar Shehu na da raban arziki har gobe!”

Magidantan kuwa duk da sun yi maraba ba da ganin Usman, ba su fasa tambayar

“Kai kuwa Shehu Magaji ina ka je ka juyawa tsatsun ka baya haka? Ashe rai kan ga rai?”

Shauki da jimami ya sa Usman kasa fadin komai, hawayen farin ciki ne ke fita daga idanun sa, Allah Allah ya ke su karasa cikin Rugar ya ga Iyar sa.

“Iya ta? Mu karasa ciki na ga Iya ta sai na mu ku bayanin komai!”

Tuni matasa su ka tsaya da sowa, yayinda kowa ya sha jinin jikin sa.

“Iyar ka? Ashe ka na da Iya? Ka damu da ita? Ya ka zo mu je na kai ka gun iyar ta ka ta na nan kwance ta na jiran ka!”

Cewar wani magidanci ya ke kani wajan mahaifiyar Usman. Ya na magana ne da harshen fulatanci

“Kawu Iliya….”

“Shiiiiiii! Kar ka damu, biyo ni kawai!”

Cewar Kawu Iliya yayinda ya fizgi hannun Usman, Bello na biye da su, sauran jama’a babu wanda ya biyo su. Usman be tsorata ba sosai sai da ya ga sun gifta Rugar Shehu ba su shiga ba, Kawu Iliya ya wuce da su can jeji in da ake rufe matattu. Gaban wani saban kabari ya tsaya, idanun sa na fidda kwalla ya ce

“Ga iyar ka nan kwance! Yau kwana bakwai kenan da ?asa ya rufe ta, ta mutu da sunan ka bakin ta, ta kira ka Usman, ta kira ka, ba ka zo sanda ta ke bukatar ka ba, yanzu ga ta kwance sai ka mata addua”

Ihu da kururuwa Bello ya saka yayinda ya zube kan kabarin Maihaifiyar su ya na mai rungumo kasar. Wani irin tsawa Usman ya daka masa wanda ya sa shi tashi a firgice tare da shiga hayyacin sa.

Hakan ya bawa Usman damar tsugunnawa gaban kabarin Iyar su, ya na mai dafawa ya mata addua sannan ya debo kasar kabarin da hannun shi, a hankali ya ke sakin kasar yayinda iska ke kadawa har duka kasar ya bi iska ya rage sai kura hannun sa.

“Wallahi! Wallahi!! Wallahi!! Billahil azi! Na rantse da Allah kamar yanda wannan kasar ta baje a iska, haka farin ciki zai baje a rayuwar ki Zainab……wannan shi ne sakayya mafi dacewa da ke!”

Cewar Usman ya na mai fitar da kwalla, daya na bin daya.

Alhamdulillah.

Auren Shehu

13

Da taimakon direban da ya kai Ammy Wanda dawowar sa kenan aka sa Malam cikin mota.

“Ba mu san me ya same shi ba, mun tarar da shi kwance a bandaki cikin wanan hali da ku ka gan shi yanzu, diyar sa ta fadi sunan asibitin da za a kai shi, wani turanci ne wallahi ya kwanta min”

Cewar Usman wanda shi ke zaune bayan mota, kan Malam kwance bisa kafarsa, ya na maganar ne cikin kokarin tuna asibitin da Halitta ta fada masa.

“Toh ai zaifi wata daga cikin iyalan na shi su fito a tafi asibitin da su, Hajiya ba ta nan ne?”

Daya daga cikin daliban Malam ne ya tambaya cike da damuwa.

“Eh haka zai fi, Hajiya ba ta nan, bari a kira daya daga cikin ‘ya’yan na sa”

Usman ya fada ya na mai duban Jauro da Isa da niyar daya daga cikin su ya taimaka ya kira su Halitta. Ganin haka Jaura ya kada baki ya ce

“Dan cirani wannan kuma ai aikin ne kai da ka ke sirikin gidan, mu masu gadi ina mu ina shiga gida haka? Maza shiga ka kirawo matar ka a tafi”

Wani mugun kallo da Usman ya harbi Jauro da shi ya sanya shi saurin wucewa ciki ya na fadin

“Toh ni jan idan ka me zai min, dan ka zama surikin Malam ba zai ba ka lasisin aikan mutane kamar yaran ka ba, ka dai ci darajar masu daraja!”

Maganganun da Jauro ya ke ne ya dan ja hankalin wasu daka cikin daliban Malam har suna musayar kallan juna, dama suna da labarin abin da ya faru daren jiya. Idan Usman ya damu da lafazan jauro sam be nuna ba, kallan Malam ya ke ya na fadin

“Sannu Malam, Allah ya ba ka lafiya, Allah ya ma ka afuwa”

Jim kadan Jauro ya dawo Halitta biye da shi, hijabin da ta saka tare da nikabin da ta saka be boye hawayen da ke zuba daga idanun ta ba dan kuwa har ya dan jika nikabin.

“Matar ta ka ta ki fitowa sai kanwar ka”

Cewar Jauro ya na mai nuna halin ko in kula da kallan da Isa ya bi shi da shi. Cikin azama Halitta ta shiga gaban mota ta na mai rufo kofa, direba wanda dama shi ma tuni ya zauna a nashi guri ya sakawa mota key, Isa da sauran dalibai suna mai yiwa Malam addua aka rufowa Usman kofa. Tuni Jauro ya bude gate, direba na mai tashin mota cikin gaggawa su ka dauki hanyar asibiti.

Tun da su ka dauki hanyar asibiti Halitta ke gwada numbar Ammy duk sanda ta kira amsa daya nakurar ke bata, na
‘numbar da ta kira a kashe ta ke, ta sake gwadawa anjima’

Har su ka kusa isa asibiti ba ta sami numbar Ammy ba, sai na kanwar Ammy wacce ita ma din Kano ta ke aure. Bayan Halitta ta sheda mata abin da ke faruwa na game da rashin lafiyar Malam ta tambaya ko Ammy ta je gidan ta? Cike da mamaki da damuwa ta ce ba ta je ba, a tambayi direban da ya tafi ina ya kai ta, sai a sannan wannan azancin ya zo wa Halitta. Bayan ta aje wayar ta ke tambayar direba ina ya aje Ammy? Direba ya ce shi dai tasha ya aje ta.

Isar su asibiti likitan da ke duti ya mu su karbar gaggawa ta hanyar sawa Malam robar shakar numfashi ta hanci da baki, sannan aka kwantar da Malam kan gadon da ke offishin sa. Halitta kadai ya amincewa zaman Office din sa’ilin da ya gama duba Malam ya ke tambayar ta ko ya shiga matsanincin damu ne? Allah ya takaita da ya fadi wani bangare na jikin sa be dena aiki ba, Halitta ta amsa da “uhum” kawai ba tare da ta iya ba shi cikakken amsa ba.

Sai da aka samu jikin Malam ya dan lafa sannan aka mayar da shi dakin kwantar da masu jinya, Amma har lokacin robar bada taimakon numfashi ne a bakin sa. Usman na mai duban Halitta ya furta

“Shin kin sanarwa Hajiya kuwa?”

Kai ta girgiza masa, murya dashe tsabagen kukan da ta sha ta amsa da

“Wayar ta ba ya shiga, kuma ban san in da ta je ba bare na kira su”

Shiru ne ya biyo baya na wani dan lokaci, daga bisani ya nisa tare da fadin

“Dare na yi, ina ga zai fi a mayar da ke gida ko? In ya so kya dawo da safe kila kafin nan an sami Hajiya….”

“Ni ah ah nan zan kwana gun Dady”

Halitta ta katse shi cikin nuna kafiya. Usman na kallan ta cike da tausayi ya sake fadin

“Ki yi hakuri ki tafi, jinyar namiji sai namiji, ba za ki iya…..”

“Ba namiji ba ne, Dady na ne fa!”
Ta fada ta na mai fashewa da kuka. Shiru ya mata na wani dan lokaci, har ta yi kukan ta ta gama. Sai ji ta yi ya na kiran direba, cike da umarni ya ce da direba

“Maza ka mayar da ita gida….”

“Ni ba zan je ba ai na fada…”
“Shhhhh za ki je yanzu ma kuwa…”

Yanda yayi maganar ne cikin ba da umarni ya sa da ga Halitta har Direba tsayawa su na duban shi, ganin haka ya dan sassauta murya tare da fadin

“Malam ba zai ji dadi ba idan har ki ka zauna a nan, kuma kin ga ai farin ciki da samun lafiyar shi ki ke fata ko?”

Kai ta gyada masa kamar karamar yarinyar. Cikin rarrashi ya furta

“Yauwa diyar halak, Allah ya mi ki albarka. Yanzu sai ki tashi ku tafi ko?”

Ga mamakin Direba sai ga Halitta ta tashi, bayan ta sake duban Malam, ta kalli Usman ta ce

“Ka kulan min da shi, Zan dawo da safe”

“In Sha Allah”
Ya amsa mata a takaice. Hakan nan ba a san ran ta ba su ka bar asibitin. A hanya ta yanke hukuncin kiran yayar babbar Malam Hajja Dudu wacce dama ta san da auren Zainab da Maigadi da Malam ya daura. Nan ta fada mata halin da ake ciki na rashin lafiyar Malam, tare da tafiyar Ammy. Ta na mai salati da sallalmi ta yiwa Halitta alkawarin baro Maiduguri da asubar fari.

Da misalin karfe goma Halitta ta isa gida, ta tarar da Falmat zaune cikin zulumi, ganin ta taso da sauri ta na tambayar jikin Malam. Halitta ta amsa mata da sauki, ko ta sami Ammy a waya? Falmat ta ce ba ta same ta ba, Amma bari ta sake tambayar Zainab. Ta wuce dakin Zainab ganin ta yi dai dai ta na baccin ta cikin kwanciyar hankali da ke dama akwai bashin bacci kan ta ya sanya Falmat dawowa falo, Amma ta kasa fadawa Halitta Zainab din bacci ta ke, ta yi karya Zainab din ma ta ce ba ta same ta ba.

Iya ce ta shigo jin sun dawo, ita ma tun tafiyar su Halitta asibiti ta ke zaman jiran su. Bayan ta tambayi jikin Malam, tare da ko an sami Ammy ne ta yiwa Halitta tayin abinci, Halitta ta ce mata ta koshi sam bakin ta ba dandano. Da haka ta shige dakin ta, alwala ta yi ta yi sallar ishai tare da yiwa Malam addua, Allah ya kawo sauki cikin lamarin sa.

Washagari da sassafe Halitta da Falmat su ka nufi asibiti, Zainab kyememe ta ki bin su cewar ta ba ta so ta je ta ga wannan dan Boko haram din da Malam ya ce ya daura mata aure da shi. Sai da su ka isa sannan Usman ya tafi ya bar Malam tare da su Halitta da direba. Jikin Malam kam a iya cewa da sauki na bahaushe amma har lokacin ya na jin jiki, haka kuma be fara magana ba bare ma ya ci abincin da Halitta ta girka masa.

Kamar wasa Halitta ta gwada wayar Ammy sai gashi ta shiga, ta na kuka ta ke fadin

“Ammy kin tafi kin bar mu ga Dady nan kwance a asibiti rai a hannun mai duka….”

Salati Ammy ta ke yi daga dayan bangaran, cike da damuwa ta ke tambayar me ya faru? Me ya sami Malam? Nan Halitta ta kwashe komai ta fada mata, ta kare da

“Dan Allah Ammy ki tausaya mana ki dawo..”

Ammy wacce jikin ta ya gama sanyi ta yiwa Halitta alkawarin dawowa da sun isa Yobe, dan kuwa ta na hanyar Maiduguri amma sun kusa isa Yobe. Da wannan su ka yi sallama. Halitta ba ta jima da aje wayar Ammy ba sai ga Hajja Dudu, tare Uwargidan Malam Hajja Kilishi, sai kuma babban dan Malam wanda ake kira Gana. Tun asubar fari su ka dau hanyar Kano.

Ganin halin da Malam ya ke ciki tuni Hajja Kilishi ta fashe da kuka ta na mai tambayar musabbabin halin da Malam ke ciki. Daga Halitta har Falmat ba su so zuwan Hajja Kilishi ba, dan kuwa sun san ran Ammy ba karamin baci zai yi ba muddin ta zo ta tarar da ita.

Haka su ka wuni a asibiti, an samu Malam ya fara magana sama sama haka kuma ya dan ci abinci. Da yamma Usman ya dawo, ganin dakin Malam cike, ciki har da Zainab wacce tun ta hango sa ta ke watsa masa harara ya sa yayi jim kamar zai koma. Halitta ce ta masa iso ta hanyar fadin
“Usman shigo mana, ya za ka koma”

Cike da yar kunya ya shigo, ya tsugunna har kasa ya gaishe da Hajja Kilishi da Hajja Dudu. Su ka amsa ba yabo ba fallasa, Gana ya bashi hannun su ka gaisa. Hajja Dudu ce ta tambayi Halitta ko wanene Usman. Kafin Halitta ta ba da amsa Zainab ta yi carab ta ce

“Maigadin mu ne”

Gudun kar Halitta ta fadi dangantakar auratayya da Malam ya kulla tsakanin su, Nan kuwa ba ta san labari ya riga ya iske mu su. Maganar da Hajja Kilishi ta yi ne ya tabbatar mu su da hakan na cewa

“Ko shi ne sirikin namu mijin Zainab?”

Ras! Gaban Zainab ya fada, ta na mai dauke kai ta hadiyi yawun bakin ciki.

“Eh shi ne”

Cewar Halitta wacce amsar da ta bawa Hajja Kilishi ya mata nauyi matuka a baki, ta na mai danne kishin da ya taso mata ta kara da

“Shi ne ma ya kwana da Dady jiya”

Dukan su kallan Usman su ke, kan sa ke sunkuye. Jin amsar da Halitta ta ba su ya sanya ya dan dago kai ya na mai duban Zainab ta wutsiyar idanu. Ganin haka ya sanya Zainab watsa masa harara cike da tarin tsana.

“Allah sarki, sannu Allah ya ma ka albarka, ba a banza Malam ya ba ka auren diyar sa ba, ka cika dan halas, yanda ka rufa mana asiri Allah ya rufa na ka duniya da lahira”

Cewar Hajja Dudu wacce tun shigowar Usman ta yaba da hankali sa. Zainab kuwa ji ta ke kamar ta tashi ta fita a guje tsabagen tsanar Usman da ta yi. Jin Usman ya mu su sallama ya ce zai koma tunda Gana ya na nan ne ya sa Zainab dan samin sauki cikin ran ta.

Bayan tafiyar shi su ka shiga tattauna auren Zainab, in da Gana ke nuna rashin dacewar auren a nashi ganin auren zai iya zama wani barna maimakon gyara a rayuwar Zainab, in aka yi la’akari da yanayin wayewar Zainab da kuma ilimin ta. Ya ce zai yiwa Malam magana a san yanda za a yi a warware wannan aure tun kafin ya haddasa wata matsalar gaba. Maganar ba karamin dadi ta yiwa Zainab ba, duk da dai Hajja Dudu da Hajja Kilishi sun nuna rashin goyan baya akan hakan.

Sai dab da magrib Ammy ta iso dauke da akwatin ta, dan ko gida ba ta je ba bare ta ji labarin zuwan su Hajja Kilishi wanda ganin ta ba karamin bakan ta mata rai yayi ba. Ta tarar Malam ya na bacci amma ganin Hajja Kilishi tuni ta fara kalallame shi, daga ya dan motsa sai ta zabura ta matsa kusa da shi cikin nuna kulawa. Ita kuwa Hajja Kilishi ta na daga gefe ta zuba mata Ido kawai. Cikin ran ta mamakin yajin da Ammy ta yi ta ke ji.

Ko da Malam ya bude ido ya ga Ammy sam be nuna wani farin cikin ganin ta ba, sai ma idan ya na da bukatar wani abu ya ce da Hajja Dudu ko Hajja Kilishi ta masa. Hakan ba karamin musgunawa Ammy yayi ba. Haka kuma duk yanda Ammy ta so kwanan asibitin Hajja Dudu ta yi kyememe ta hana, cewar ta gwara Gana ya zauna da Malam ai jinyar namiji sai namiji.

Bayan kwana uku Hajja Dudu ta koma Maiduguri, Ammy na ji ta na gani Hajja Kilishi ta tare mata a gida, cewar ta babu in da za ta je sai Malam ya sami sauki sosai. Duk yanda ta so ta tunzura ta ta koma ta ki, haka ta hakura. Wasa wasa sai da Malam yayi sati biyu a asibiti, kafin a sallame shi sai da likita ya jaddada hutu da kwanciyar hankalin da Malam ya ke bukata wanda hakan ne ya sanya Gana yanke hukuncin wucewa da Malam Maiduguri bayan ya ji cikakken bayanin abun da ya faru daga bakin Jauro, wanda be boye masa komai ba. Sai ga Gana mai kudirin samar ma Zainab yanci na mai gargadin ta matukar ta kashe mu su uba ita da uwar ta wallahi ba su yafe mata ba.

Sai da su ka dawo gida Gana ya hade kayan Malam kaf, ga mamakin Ammy Malam be yi musu ba, shi ne ma ya ke fadawa Gana kalar kayan da zai zaba masa, in da ya ke cewa ya fi san farare saboda tafsirin azumi ya gabato, sati biyu ya rage a fara.

Bayan Malam ya sallami su Halitta, tare da mu su alkawarin zai dawo bayan sati biyu kafin azumi ya kamkama, ya na mai duban Zainab ya furta

“Yakura kin dai san ke matar aure ce, cikin sati biyun nan da na ke kwance asibiti ban sani ba ko kin cigaba da halin ki na haura katanga ki fita yawan lalace, toh ki budi kunnuwan ki ji ni da kyau, wallahilazim matukar ki ka kara aikata haka ba za ki gama da duniya lafiya ba, Allah ya isa ban yafe mi ki ba….”

Dagowa ta yi a gigice ta na duban Malam, hakan ya sa Malam jinjina kai, ya kara da

“Ware ido ki kalle ni da kyau, ba dan da karar kwana ba da tuni bakin cikin ki ya kashe ni Yakura, toh amma Alhamdulillah Allah shi ne zai jibanci lamura na, ba za ki tuzarta ni ba! Ba ki isa ba!”

Jiki sanyaye Zainab ta furta

“Ba zan kara ba Dady”

“Idan ma kin kara kan ki za ki yiwa, kin dai san ke matar aure ce. Bayan haka daga yau idan ki ka sake kwana a dakin da ba namijin ki ba ba tare da kwakkwarar hujja ko dalili ba Yakura shi ma ban yafe mi ki ba”

Jin haka ta saki kukan da ta ruke shi can kasan magoro, fadi ta ke

“Dan Allah Dady ka kawo min dauki ka sauwake min wannan nauyi da ka daura min, wallahi ba zan iya kwana daki daya da shi ba Dady, dan Allah Dady”

Cikin halin ko in kula Malam ya furta

“Ki ka iya kwana gidan rawa bare dakin auren ki? Kai Gana kana ina? Maza zo mu tafi ko Allah zai sa na dena ganin wannan yarinyar!”
Zainab na gani Malam ya shige mota ya barta da nauyi mafi tsanani a rayuwar ta. Haka kuma Ammy wacce duk yanda ta so ta sauke girman kai ta bawa Malam hakuri ta kasa tsabagen kishin zaman Hajja Kilishi, gashi ta na ji ta na gan ta ci nasararr tafiya da shi.
_

*A gafarce ni, in Sha Allah zan sake posting kafin Sunday.*
_

*Khadija Sidi*
Auren Shehu

7.

Majalisar tasu wacce ta ke kusa da gidan Malam ya isa, Ya tarar ta cika yanda ya so, Dan haka zuciyar sa wasai ya ce

“Na zo da labari da ?umi ?umi, wannan jaridar sabuwa ce kal!”

Cikin kaguwa su ji labarin daga me cewa

“Siyar mana”

Sai wanda ya ce

“Ba mu mu sha”

Sai da ya sami waje ya zauna, cikin nuna gwaninta ya ce

“Yau da ido na na ga mace ta hauro daga gidan Malam………”

“Ahab! Toh wannan sabon abu ne? Har wani labari da dumi dumi? Toh ai idan wanan ne na sha gani malam!”

Daya daga cikin samarin ya katse shi. Uku da ga cikin su da sam ba su taba ji bare su gani ba kuwa baki su ka ruke, cike da mamaki guda ya ce

“Kai Uzairu ka ji tsoran Allah! Da kai ma Khalifa! Gidan Malam fa ka ce! Wannan ya tashi daga karya sai dai a kira shi kazafi!”

“Mtsw kai ne a gun ka sabo, kai Uzairu fada mana sabon abu ba wannan ba Alhaji”

Cewar daya daga cikin samarin da shi dama ya taba gani shi ma. Shi kuwa Uzairu da ya kawo gulma gwiwar sa ce ta yi sanyi, dan kuwa sun sace masa gwiwa, cikin so ya burge ya ce

“Ba nan kawai abin ya tsaya ba, wani namiji ne ya ruko kugun ta, gaban ido na su ke ta badala, tun suna daga waje har su ka shige mota, Allah ya kadai ya san me su ke aikatawa ciki dan kuwa gilashin baki ne wuluk….”

“Kai auzubillallah ko ma wacece wannan ba ta da ala’aka da Malam! Ba jinin Malam ba ce!”

“Eh toh ko ma wacece dai daga gidan Malam ta ke, dan kuwa a kulli yaumin in za ka gan ta fuskata rufe ta ke da wannan abun da su ke rufe fuska da shi tsabagen munafunci! Kai ni har da asuba na sha gani ana dawowa da ita!”

Cewar Uzairu ba tare da ya kula da tashin hankali da sauran samari da su ke masoya Malam su ka shiga ba. Daya daga cikin su wanda har lokacin ya kasa yarda da abin da ya ke ji ne ya ce

“Kai Uzairu, tsakani da Allah ban ji dadin wannan magana ta ka ba, Bai kamata ba, shin yanzu ina amfanin wannan kazafi haka?”

“Oh toh kazafi ne ma?”

Uzairu ya tambaya cikin nuna bacin rai.
“Eh kazafi mana, yanzu idan mun je za mu ga abin da ka fada zahiri?”

Uzairu na susa kyeya ya ce
“Ai sun bar wajan……”

“Ai dama ba nan za su zauna ba, amma da za ku zauna waccar rumfar ta kusa da gidan Malam har dare ya raba ko ma asubar fari kila ku ga an zo an sauke ta”

Cewar Khalifa wanda ya ke maganar ko shakka babu. Daya daga cikin su wanda dama dan adawar Malam ne sakamakon rashin jituwa da ke tsakanin mahaifin shi da Malam ya ce

“Allah dai ya biya, ka ce yau za mu yi kwanan waje, dan kuwa sai mun ga abin da ya turewa buzu nadi!”

“Ni ma dai Habibu, za mu kasa mu tsare sai mun ga mai kan uwar daka!”

Cewar Uzairu da dama haka ya ke so, ya sami wanda zai taya shi dan kuwa dai muddin bai gano wacece ba hankalin sa ba zai kwanta ba. Su kuwa samari biyu wanda su ke ganin hakan bai dace ba saboda darajar da Malam ke da shi, tashi su ka yi su ka bar wajen, sauran na bin su da habaici kila Malam ya mu su alkawarin kujerar makka ne.

Su Zainab kuwa kasancewar lokacin da su ka saba shiga club bai yi ba, yawo Mike ya wuce da ita, sai da su ka gama zagayen su sannan su ka zauna wani dan garden da ake sayar da kayan kwalama. Mike ya siya mu su abin jika makoshi da gashesshen kifi. Da kyar ya samu ta ci ta dan koshi, sannan ya sake tambayar ta abin da ke faru. Nan ta labarta ma sa komai. Ran Mike yayi matukar baci, ba tare da yayi la’akari da iyayen Zainab ake magana akai ba ya furta

“Why? Me ya sa ka? Wannan ai son kai ne! Shekarun ki ya wuce 18, kin wuce a mi ki dole! Ba wanda ya ke da wannan damar! Kar da ki yarda a yi mi ki auren dole kin ji ko? In sun takura mi ki you should take them to the court! Ni zan tsaya mi ki”

Fuska cike da hawaye ta ke duban shi, ta na mai girgiza kai ta ce

“No Mike you don’t understand, they’re my parent, ba zan iya ba, Daddy Malami ne, sananne kuma, imagine yanda zai ji idan na kai shi court……”

“Just listen to yourself! You should think about yourself, your happiness first kafin na kowa! Shi yayi tunanin wani hali za ki shiga in ya mi ki auren dole?”

Mike ne katse ta, ya na mai ruko hannun ta ya ce

“Zeee look at me!”

Ta dago manyan idanun ta ta na duban sa, cikin murya mai ratsa zuciya ya ce

“You’re beautiful, God you’re very very beautiful! ga ki yarinya! You have a long way to go in life, in ki ka bari aka mi ki aure I’m sorry to say it might be the end of everything, your freedom, your happiness and even your beauty musammam ki fara having children…..”

Zainab na girgiza kai ta ce

“Ah ah, ba na so Mike, ba na so”

“Then tell your Dad, ba ni ba, in kin je gida look him in the eyes and tell him, ki fada masa ba ki yi shirin aure yanzu ba, ki fada masa ba za ki auri dan abokin sa ba, ya bar ki ki yi rayuwar ki! Ya dena wani yaudaran ki da ke ce favorite child din shi, he should know by now kin girma, kuma kin san yancin ki!”

Shiru ne ya biyo baya, kafin daga bisani Zainab ta nisa, ta na mai goge hawaye ta ce

“Zan yi kokari na ganar da shi Mike, I promise you auren nan ba za a yi shi ba”

Cikin jin dadi ya ce

“Yauwa ko ke fa! Oya share hawayen ki, mu tafi ma mu ji dadin mu a club da fatan dai you’re wearing something sexy under this your agbada hijab”

Ya karasa maganar ne ya na mai bin jikin ta da kallo. Ba tare da ta nuna damuwa da irin kallan da ya bi ta da shi ba, Jin batun club ya sa ta duba lokaci, in da agogon ta ya nuna karfe shabiyu da minti 40. Tashi ta yi da sauri ta ce

“No ba zan iya dadewa a waje ba, kasan Daddy ya na nan Mike”

“Ohoooo! Ke da Dadyn nan na ki! Kin fiya tsoro wallahi! Idan ya na nan sai menene! Haba mana”

“Ba za ka gane ba”

“Try me, ganar da ni mana”

“Mu shiga mota, mu na tafiya ina ma ka bayani”

Haka ba yanda ya so shi ma ya taso su ka shige mota in da su ka dau hanyar gida.

Ammy kuwa har ta kwanta amma ta nemi bacci ta rasa, Zainab da damuwar da ta ke ciki ne ya sa ta kasa bacci. Da abin ya ishe ta ne ta tashi ta nufi dakin Zainab. Ko da ta shiga ta ga ba ta nan sai ta yi tunanin ko bandaki ta shiga, Nan ma ta buga kofar tare da kiran sunan ta. Shirun da ta ji ya sanya ta bude kofar yayin da gaban ta ya shiga faduwa ganin bandakin ma wayam Zainab ba ta ciki.

Dakin Halitta ta nufa jikin ta na rawa ta na mai fatan ko dai Zainab din kasa bacci ta yi, ta koma dakin Halitta ko Falmat duk dai ta san abu ne mawuyaci. Ta tarar idanun Halitta biyu, kallo ma ta ke a kan laptop. Cikin rawar murya ta ce

“Halitta ina Yakura?”

Gaban ta yayi mummunar faduwa jin tambayar Mahaifiyar su, a zahiri kuma cewa ta yi

“Ta na dakin ta mana”

“Ah ah ba ta ciki, daga nan na ke, ba ta shigo nan ba?”

Halitta na girgiza kai a sanyaye ta ce

“Ba ta shigo ba, kila ko ta na dakin Falmat…..”

Da sauri Ammy ta juya ta fice, dakin Falmat ta nufa, ita ma Halitta tasowa ta yi ta bi bayan ta, ta na mai kokarin kiran Zainab amma wayar ta ki shiga. Sun tarar Falmat ta yi dai dai ta na baccin ta har da munshari, ganin babu Zainab babu alamar ta hankalin Ammy ya fara tashi matuka. Cikin zafin nama ta fara tashin Falmat, da kyar ta samu ta bude idanun ta, cikin magagin bacci ta ke kallan Ammy.

“Ke tashi da Allah! Ina Yakura?”

Jin tambayar da aka mata take ta wastsake ta ce

“Yakura kuma Ammy? Ba ta dakin ta?”

“Mtsw da ta na can da zan zo ina tambayar ki ne? Ba ta shigo nan ba?”

“Rabona da ita tun sanda na shiga dakin ta kiran ta mu ci abinci, kun duba kitchen? Kila yunwa ya tada da ita ta je kitchen neman. ….”

Ammy ba ta bari ta karasa ba ta juya ta fita da sauri, kitchen din ta nufa, Halitta da Falmat biye da ita, hatta store da dakin baki sai da su ka duba, babu Zainab babu alamar ta. Falo su ka dawo, Ammy wacce ta fara fita hayyacin ta tsabagen firgici sai ga ta tana duban bayan kujera, idanu cike da kwalla, murya na rawa ta ce

“Oh ni Aleesha na shiga uku ina Yakura ta shiga da tsohon daren nan? Malam! Kila ta na bangaran Malam! In kuwa ba ta nan gwara na tashe shi na sanar ma sa tun wuri Yakura ta bata! Toh ko sace ta aka yi! Na shiga uku wayyo Allah na!”
Ganin yanda ta zabura za ta wuce bangaran Malam Halitta ta yi saurin dakatar da ita ta hanyar fadin

“Ammy dan Allah ki tsaya ki kwantar da hankalin ki, kar ki tashi Daddy Yakura ba ta bangaran shi, ba sace ta aka yi ba, da kafar ta ta fita……”

“Ki na nufin guduwa ta yi saboda za a mata auren nan? Wayyo Yakura da ba ki yanke wannan danyan hukuncin ba! Mun sanya diyar mu cikin wani hali, ya Allah ka kare mana ita! Halitta kin san za ta gudu ya aka yi ki ka bari ba ki fada min ba”

Ammy ce ke simbatu ta rasa abin da ke mata dadi sai kai kawo ta ke. Falmat kuwa kallan su ta ke a tsorace dan kuwa har lokacin ta kasa fahimtar abin da ke faruwa. Ammy na mai goge hawayen da ya fara fita daga idanun ta, ta ce

“Kai bari na shedawa Malam Yakura ta gudu, Yakura ta sa kafa ta gudu da tsohon daren nan tsagen ba ta son auren da ya kulla”

“Ammy na ce kar ki fadawa Daddy, Yakura ba guduwa ta yi ba! Za ta dawo! Ki kwantar da hankalin ki dama ta saba fita!”

Daga Ammy har Falmat Halitta su ke duba cike da mamaki, wacce kallan da su ke mata ya sanya ta farga da subul da bakan sa ta yi

“Me ki ke nufi ta saba fita?”

Ammy ta tambaya cikin tuhuma
“Babu komai Ammy, kawai ina nufin ko ina ta je ma za ta dawo….”

“Halitta!”

Ammy ta daka mata tsawa wanda ita kan ta Halitta sai da ta ji har zuciyar ta. Ammy ba ta gushe ba ta kara da

“Ba kya magana hakan nan kara zube, me ki ke nufi da sama ta saba fita?”

Baki na rawa ta ce

“Dama….. dama…dama wani sa’in ta na fita cikin dare, sai ta dawo da asuba, duk sanda mu ke ji kamar ana haurowa ta garden, ita ce……”

Tas Ammy ta dauke Halitta da wani gigitaccan marin da sai da ta ga wuta a idanun ta, ta na mai huci ta ke fadin

“Kun haince ni! Kun zalin ce ni! Kun cuce ni! Gani shashashar uwa, ina can ina bacci ku kuma ku nan kuna cutar da mu? Da ku ke hada baki ta na fita gidan uwarwa ta ke zuwa??”

Tunda Ammy ta fara magana Halitta wacce hannun ke rike da kuncin ta take girgiza mata kai, dan kuka ta ma kasa magana.

“Ba da ke na ke magana ba? Gidan uwar wa ta ke zuwa!”

“Ammy dan Allah ki yi magana a hankali kar da Daddy ya jiyo mu”

Cewar Falmat wacce ita ma din kukan ta ke.

“Idan ya ji sai me? Sai na fada masa diyar ta shi da ya fi yiwa kyakkyawan zato ce ke hada baki da kanwar ta, ta na haura katanga! Wannan masifa har ina ni Aleesha!”

“Dan Allah Ammy ki yi hakuri, wallahi tallahi ba hada baki mu ka yi ba, sam ban da masaniya da ya wuce fitar da ta ke, shi ma din gudin halin da za ku shiga ya sa na kasa fada mu ku, Amma ina kokari na wajan yi mata nasiha da kuma addua…”

Halitta ce ke magana cikin kuka. Hannu biyu Ammy ta dora aka, ba su kara firgita ta ba sai da su ka ga hawayen na kwaranya daga idanun Ammy. A tare su ka furta

“Dan Allah Ammy ki yi hakuri”

Tuni ta canza harshe to koma yare, ta na mai fadin

“Menene amfanin rufewar da ki ka yi? Yanzun kin min adalci kenan Halitta? Ki na gani yar uwar ki na cutar mu da mu Amma ki kasa fada min, nasihar ta ki da adduar ta ki amfanin me ta yi mana? Yakura ta cuce ni, ta cuci kan ta, ta cuci Malam! Ina waya ta? Ba ni waya ta!”

Wayar ta ta shiga nema, ganin wayar ba ta kusa ta dubi Halitta wacce ke rike da na ta wayar, ta ce

“Kira min ita, kira ta ta fa?a min gidan uwar wa ta ke!”

Hannu na rawa Halitta ta kara kiran wayar Zainab, ta ci sa’a ya shiga amma kuma har ta gama kara ta katse ba ta daga ba. Haka ta yi ta kiran ta amma ba a dagawa, ganin haka Ammy ta koma kan kujera ta na tunanin mafita, shin Malam za ta tasa ta fada masa halin da su ke ciki ko kuwa dai ta jira Zainab yanda za ta hukunta ta ba tare da Malam ya san halin da su ke ciki ba?

Su Uzairu kuwa a na su bangaran zama su ka yi a mararrabar gidan Malam su na jiran dawowar Zainab da Mike, saura da su ka gaji da jira cewa su ka da Allah in dan sun karaso su ma a yi mu su waya.
Ganin shiru har karfe daya babu alamar motar Mike Khalifa ya ce

“Baba kamar fa wannan mutanan ba za su dawo ba, Ni ma gwara na tafi na……”

Motar da ta dan haske su kadan kafin a rage hasken motar ta gifta gaban su ya sanya Khalifa shanye sauran maganar da ya ke. Daga shi har Uzairu bin motar su ka yi da kallo, illa kuwa mota ta ja ta tsaya dan gaba kadan da gate din gidan Malam, ta daidai garden da ta saba haurawa.

“Alquran wannan motar ce, wabillahilazi!”
Cewar Uzairu ya na mai nuna motar da dan yatsa.

“In dai kuwa su ne maza kirawa so Munir da Habibu, su zo maza yau za su sha mamaki!”

Khalifa ne ke maganar in da shi ma ya ke kokarin kiran na shi mutanen dan kuwa yau sun sha alwashin gano ko ma wacece wannan yarinyar mai haura katangar gidan Malam.

Sam Mike bai lura da su Uzairu ba, bare ma ya san da zaman su. Bayan ya faka ya riko hannun Zainab, cikin bata kwarin gwiwa ya ce

“Na san za ki iya kwatarwa kan ki hakki Zee, please do it for us”

Karar wayar ta da ta fada hannun kujera ta ji, da kyar ta iya daukowa, da ta duba ta ga wacce ke kiran ta ya sa ta jan tsaki

“Mtsw wannan wawuyar yarinyar ba za ta sakar min mara ba ko!”

“Wacece?”

“Sister na ce, I’m sure ta shiga daki na ta ga ba na nan ne ya sa ta ke kira na, rabu da ita ba zan dauka ba, bari na yi sauri na haura sai na ce mata daga garden na ke”

Ta bashi amsa yayin da wayar ta katse, hakan ya bata damar ganin miss calls din Halitta har goma sha uku.

“Kai wannan ba dai mayya ba, bari na tafi kar ta jaza min masifa”

Ta na maganar ne yayin da ta fito da sauri ta mayar da murfin mota ta rufe, sannan ta zaga wajan Mike da niyar masa sallama, hakan yayi daidai da hango samari hudu da ko shakka babu gun su su ka nufo. Da ke garin da dan duhu daga Zainab har Mike ba su iya tantace wasu irin mutane ba ne. Hantar Mike tuni ta kala, cike da tsoro ya ke duban Zainab da ga cikin mota ya ce

“Su waye wannan?”

“I don’t know, ban sani ba, I don’t think it’s safe, bari na koma mota mu bar wajan kawai”
Cewar Zainab dan kuwa ta tsorata ainun, ta na kokarin bude motar Mike ta koma ciki, ga mamakin ta sai gani yayi ya tada motar shi, ya ce

“No Zee, kar ki shigar min mota, babu mamaki set up ne daga Baban ki, dan a kama ni, gani Christian, I can’t go with you, I can’t risk it!”

Yanda ya figi motar da yanda samarin su ka bi motar a guje kamar za su iya kama motar ya sanya Zainab kaduwa, ta yi shahada ta sheda babu sarki sai Allah, dan kuwa ko da Mike ya tsarewa samarin nan kan ta su ka dawo, ganin haka ita ma sai ta gwada yin abin da Mike yayi, ta juya za ta arta a na kare, ba ta kai ga wuce gate din gidan su ba su ka cimma ta, in da su ka zagaye ta, yanda su ke mayar da numfashi, Daya bayan daya ta ke bin su ka bin su kallo, dan tsoro ta kasa furta komai.

“Ke wacece? Ki bude fuskar ki Malama! Duk abin da ki ke mana a unguwa muna sane da ke! Kuma yau din nan sai mun tona mi ki asiri!”

Cewar Uzairu wanda ya fi kowa za kewa. Ganin an bude gate din gidan Malam tuni hankalin su ya koma can, musammam Zainab wacce jikin ta har rawa ya ke. Haushin karnuka ke tashi daga cikin gidan dan kuwa karar tashin motar Mike da Kuma guje gujen v ne su ka fito a tare hannun su ruke torchlights.

 

12

 

 

Umarnin da Malam ya bawa Zainab na ta koma BQ ba karamin tashin hankali ya haddasa tsakanin Malam da Ammy ba, abin da bai taba shiga tsakanin Ammy da mijin ta ba ranar kuwa sun yi abin sam ba dadin gani bare ji. Shi kan shi Malam mamakin dama akwai ranar da Ammy za ta dubi tsabar idanunsa ta gasa masa maganganu haka ya ke. Ya na daga kwance ya ke kallonta, tun shigowar ta falon ta tsaya kan sa hannu rike da kugu in da ta ke shiga ba ta nan ta ke fita ba, sai da ta dan tsagaita Malam ya furta

“Alesha kin gama?”

“Ban gama ba Malam, idan ka ga na gama to ka raba wannan bakin aure mai cike da cuta da ka kulla tsakanin diyarka ta cikinka da Mai gadi wanda be da asali Malam! Ai ko addini cewa yayi mu zaba ma ‘ya’yan mu mazaje na gari, haka kuma mu yi bincike akan mutum kafin mu ba su auren ‘ya’yan mu, ban ga dalilin da zai sa ka lalatawa yarinya rayuwa ka aura mata maigadi wanda ba mu san komai game da shi ba! Ni jinin shuwa sulallan gwal ka biya sadaki na, Amma ka dauki diya ta, jini na ka bayar da ita sadaka!”

Ammy ta bashi amsa cikin tsiwa. Shiru Malam ya mata tamkar ba da shi ta ke magana ba. A hasale Ammy ta furta

“Malam ka na ji na fa!”

Dagowa yayi yana duban ta, ainihin so da kauna na hakika ya ke yiwa baiwar Allah nan, dan kuwa yanda ya ke san ta be so uwargidan sa Hajja Kulu ba, badan komai ba sai dan Ammy ita ce zabin ran sa, uwargidan sa kuwa zabin iyaye ce.

“Alesha duk yanda ki ke tunanin kaunar ki ga Zainab ya kai, ba ki fi ni san ta ba, Ni ne mahaifin Zainab dan haka ba zan cutar da Zainab ba, aure kuma na daura, babu abin da zai kashe auren nan sai Allah…..”

“Karatun ta Malam? ka na nufin ka salwartar da karatun ta kenan? Yakura ta yi nisa a jami’a, wata daya ya rage su koma makaranta, aji uku Yakura ta ke, semester daya ya rage ta shiga aji hudu, yar jami’a ka daurawa ma Maigadi dan ruga Malam!”

Ammy ta katse shi ta na maganar ne kamar mai shirin fashewa da kuka. Cikin halin ko in kula Malam ya ba ta amsa da

“Wannan tsakanin ta da mijin ta ne, karatun na ta, idan ya ga zai iya barin ta ta karasa fabini’ima, idan ba zai bari ta karasa ba ma wannan zabin sa ne…”

“Toh kuwa sai ka zaba! Aure na da kai ko kuwa auren Zainab da Maigadi! Wannan zalinci ba zan iya jurar ganin shi ba!”

Gaban Malam ne yayi mummunar faduwa, da sauri ya tashi tsaye ya na mai duban Ammy ya ke fadin

“Alesha? Ni ki ke fadawa haka? Auren mu ko auren Zainab?”

“Kwarai Malam, ba zan iya zama gidan nan diya ta ta ciki na ta na auren Maigadi ta na kwana a BQ ba, ba zan iya zuba ido ina kallo ana tauye hakkin diya ta ba, ka zaba Malam”

Ta bashi amsa cikin dakiya, dan kuwa ta san yanda Malam ke kaunar ta ba zai taba zaban wani bayan ta ba duk da tsanar subda ta ke zargin ya yi. Ga mamakin ta sai ji ta yi Malam ya ce

“Na zabi auran Zainab da Usman, sai yaya? Me zai biyo baya?”

Zuciya tsinke dan kuwa sam ba ta yi zato ba Ammy ta ce

“Ka zabi ka sake ni kenan? Saki nawa ka min?”

Kai Malam ya girgiza yayinda ya koma ya zauna, fuskar sa dauke da murmushi ya kai hannun sa ga qur’anin da ke aje can gefe bisa dan teburi. Ya na kokarin budewa Ammy ta sake fadin

“Saki nawa ka min”

Ya na murmushi kaici ya ke girgiza kai, kana ya ce

“Alesha ashe dai har yanzu ba ki dena tunani irin na yara ba, saki? Ni Birma na saki mata ta? Ban taba sakin iyali na ba, ba zan fara akan ki ba Alesha, kin ce na zaba ko auren Zainab da Usman, ko aure na da ke, na zabi auren diya ta, ban yarda na mayar da diyata bazawara ba, haka kuma ban sake ki ba, ba zan kuma sake ki ba…!”

“Ni kuma ba zan zauna da azzalumin miji irin ka ba! Kai ne kullum cikin wa’azi Allah ya ce annabi ya ce! Amma ka kasa kare hakkin iyalin ka sai ma cutar da mu da ka ke kokarin yi! Allah ya saka mana! Ko ka sake ni ko ba ka sake ni ba zama na da kai ya kare!”

Baki bude Malam ke duban ta ya kasa magana tsabagen mamakin maganganun da Ammy ke fada masa. A fusace ta juya fuuuu ta fice ta na mai buga masa kofa ta wuce bangaran su.

Ganin yanda ta shigo a fusace ya sa Falmat bin bayan ta tana tambayar Ammy lafiya? Me ya faru? Ba ta bata amsa ba, sai ma hade kayan ta da ta shiga yi. Cikin kankanin lokaci ta hade kayan ta tsaf cikin yar akwati. Ganin haka Falmat ta kira Halitta da Zainab wanda duk abin nan da ake ko waccar su na dakin ta tana fama da kan ta.

A falo su ka tadda Ammy ta na jan akwatin ta niki niki za ta fita. Iya na tambayar lafiya Hajiya za ki yi bulaguro ne? da sauri Halitta ta karasa gaban ta, ta na mai taro akwatin ta ke fadin

“Innalillahi Ammy me zan gani? Ina za ki je haka da yamma likis Ammy?”

“Gidan uban ku zan bari, aure na da shi ya kare, ya zabi auren Zainab akan aure na da shi!”

“Ammy ki rufa min asiri idan ki ka tafi ina zan sa kai na?”

Cewar Zainab ta na mai riko hannun Ammy.

“Uban ki ya dafa ki ya cinye!”

Ammy ta bata amsa a hasale. Cike da tashin hankali Falmat ta ke kuka, Zainab kuwa dama ta nemi kuka ta rasa sai dai na zuci, wani tsanar Usman ta kara ji, ta kuma kullaci Malam da har ya zabi rabuwa da mahaifiyar ta akan auren ta da Usman, wato ya tabbata Malam ya tsane ta ya kuma tsani mahaifiyar ta. Halitta na mai girgiza kai cikin rashin gasgata maganar Ammy ta ce

“Ammy ba haka ba ne, Daddy ba zai taba zabar rashin zama da ke ba Ammy, wannan masifa har ina, Innalillahi wainnailaihi rajiun! Ammy da kuruciya ba ki taba yin yaji ba, dan Allah kar ki yi da tsufan ku, Dan Allah Ammy…..”

“Ke rufa min baki! Kuruciya ko tsufa namiji namiji ne! Uban ku ma namiji ne! Ba uba na ba ne, ba gidan uba na ba ne, wallahi ba zan zauna bakin ciki ya kashe ni ba, matsa min daga hanya!”

Ta na mai hambare Halitta ta tare da buge hannun Zainab ta ja akwatin ta ta yi waje. Iya kuwa wacce duk abin da ya faru ba ta gidan cike da al’ajabi ta ke bawa Ammy hakuri, Ganin dai Ammy ta ki ji Iya ta ce da Falmat ta yi maza ta shedawa Malam halin da ake ciki. Falmat ta fita da sauri ta nufi bangaran Malam, ta tarar da shi zaune in da Ammy ta barshi ya na karatun al’qur’ani, ganin Falmat da kuma abin da take fada masa hankali tashe be sa ya motsa ba, bare ya nuna mata wani damuwa. Kallan ta yayi cikin nazari kafin daga bisani ya bata amsa da

“Ammyn ku ta zabi ta tafi, ku bar ta ta tafi za ta dawo ne da kafafun ta, ku kasance masu hakuri Falmat”

“Daddy ba za ka tsayar da ita ba? Ba za ka hana ta tafiya ba Daddy?”

Kai ya gyada mata, sannan ya kara da

“Ki yi hakuri Falmat, babu yanda zan iya da hukuncin ubangiji dan kuwa auren Yakura ba mai rabuwa ba ne har illa mashaAllah”

Shiru ne ya biyu baya, jiki sanyaye Falmat ta juya ta fita. Malam ya bi bayan ta da kallo na wasu dan mintina kafin ya mayar da hankalin sa ga karatun da yake.

Duk kokarin su na dakatar da Ammy a iska ya tashi, karshe ma cewa ta yi duk wanda ya biyo ta wajan gate sai ta tsine masa, su na ji suna gani ta ja akwatin ta ta fice, ko da ta zo giftawa ta bangaran Malam can kasan zuciyar ta ta so Malam ya fito yayi kokarin hana ta tafiya kamar yanda ‘ya’yan ta su ka yi. Haka ta na share kwalla ta damkawa Jauro akwatin wanda ganin fitowar ta ya taso da sauri. Shi ya sanya mata cikin mota, ya na mata fatan Allah ya kiyaye hanya.

Ta na mai watsawa Usman harara ta shige mota. Shi kuwa gate ya bude, haka kuma be fasa mata a sauka lafiya ba yayinda mota ta fice daga cikin gidan.

*****

Kamar gidan makoki haka gidan Malam ya kasance. Duk yanda Iya ta yi kokarin sanin halin da ake ciki daga wajan su Falmat abin ya gagara. Sai da ta sami Jauro ya kwashe komai da karya da gaskiya ya fada mata. Ita kan ta sai da ta kullaci Malam da Usman.

Tsoran fushin Malam ya sa Zainab ta hade kayan ta tsaf kamar yanda ya umarce ta. Iya ta sa ta kai mata su BQ ta aje, Amma ta yi kwanciyar ta daki duk da dai ta na jiran tsammanin shigowar Malam matukar ya san ba ta bi umarnin shi na komawa BQ din ba. Malam shiru be shigo ba, haka kuma ba ta ji muryar shi sanda aka yi sallar Magariba da isha’i a masallaci ba kamar yanda su ka saba ji idan ya na jan sallah ba. Fushin da ta ke da shi be sa ta kasa shiga damuwa ba, Amma tashi ta je bangaran sa ta duba ko lafiya ne ba za ta iya ba gudun abin da hakan zai jawo mata.

Da wannan tunanin ta fito falo ta tarar da Halitta sanye da hijabi da alama shirin fita ta ke.

“Ina za ki je?”

Zainab ta tambaya a dake, maganar da ta fara shiga tsakanin ta da Halitta kenan tun faruwar masifar da Zainab ta jawo mu su.

“Daddy zan kai wa abinci”

Ta bata amsa a takaice kafin ta shige kitchen, jin batun abinci ya tunawa Zainab raban ta da abinci tun jiya da rana, dan haka ita ma kitchen din ta nufa.

Iya ta hade abincin Malam bisa wani dan kwando, Halitta ta dauka, ta na jiyo Zainab na tambayar Iya ko da kaza ta na so ta yi mata farfes Halitta ta fice, cikin ran ta tana fadin

‘dole ki ci ferfesu hankalin ki kwance ya ke Yakura bayan kin dagula na kowa kin hana mu farin ciki’

A bakin kofar da zai sada ta da bangaran Malam ta hangi Usman tsaye, tuni gaban ta ya shiga faduwa hannun ta na rawa tsabagen yanda zuciyar ta ke harbawa, ta na shirin juyawa ta koma ya gan ta, cikin hanzari ya nufo ta da sauri ya na mai fadin

“Alhamdulillah, kada ki juya ina bukatar taimakon ki”

Yanda zuciyar ta ke bugawa kamar mai shirin fitowa ya sanya ta runtse idanun ta, ta na mai saurin bude idanun ta juyo ta na kallan shi yayinda ya karaso kusa da ita. Tsayin Usman ya sanya sai ta dan daga kai kadan take iya duban fuskarsa, dan kuwa in dai tsayi ne da fadi ka sami Usman an shafa fatiha.

“Yi hakuri na tsayar da ke, Malam be fito sallar Magarib ba haka ma Isha’i, a zato na wani uzuri ne ya hana shi, sai yanzu da lokacin karatu yayi Jauro ke sheda mana duk sanda ya shigo ya karaci sallamar shi Malam be amsa ba, kin ga abun da damuwa, yanzu ma na yi sallama na ji shiru”

Tun da ya fara magana ta saki baki da hanci ta na kallan sa, yanda muryar sa ta ke da girma be hana sa magana mai cike da kwanciyar hankali ba, Iyakar gaskiyar shi ya ke mata bayani duk da dai hausar ta shi ba ta fita sosai.

“Ko yaya ki gani? Ki taimaka ki duba mana domin Allah”

Halitta na mai gyara murya ta ce

“Toh toh, bari na shiga”

Ta yi saurin wuce shi ta na mai tasbihi ga Allah akan wannan masifa da ke dankare cikin zuciyar ta, wato masifar son Usman da ya ke miji ga yar uwar ta. Ba ta sami nutsuwa ba sai da ta shiga falon Malam ta na mai doka sallama, shirun da ta ji ne ya sanya ta karasawa har tsakar falon, ganin Malam ba ya ciki ya sa ta aje kwandon abinci, ta nufi dakin sa ta fara sallama, Nan ma shiru, a tsorace ta fara bugawa da karfi ta na sallama, jin shiru ta bude kofar dakin da sauri ta shiga, nan ma Malam ba ya ciki.

Ta na shirin juyawa ta fita ta jiyo kamar gurnanin numfashi na fita daga bandaki, a guje ta karasa ta bude bandakin, idanun ta yayi tozali da tashin hankali, Malam kwance a kasan bandaki hannun sa bisa kirjin sa, yanda ya ke gurnanin wajan fitar da numfashi ya sanya Halitta fasa ihu ta na fadin

“Daddy! Na shiga uku! Daddy Innalillahi wainnailaihi rajiun!!”

Jan shi ta fara yi tana kokarin tada shi, sai da ta sa iya karfin ta, Amma ta kasa sannan ta tuna da Usman da ke tsaye ya na jiran ta. A guje ta fita ta na fadin

“Usman Daddy na! Usman zo ka taimaki Daddy na!”

Tun kafin ta karaso ya juyo ihun ta, da sauri ya kutsa kai ciki kafin ta kai ga fitowa in da ya ke, tambayar ta ya ke

“Me ya faru? Me ya sami Mallam?”

Nuni ta ke masa da hannu izuwa dakin Malam, ta kasa magana tsabagen kuka da ya ci karfin ta. Cikin zafin nama Usman ya karasa dakin Malam, in da ya tarar da Malam kwance cikin halin da Halitta ta barshi.

“Allahumma ajirni fi masibati haza wakallifna minha! Innalillahi wainnailaihi rajiun”

Cewar Usman yayinda yake duba tufafin jikin Malam domin ya tabbatar da duka tsaraicin sa rufe ya ke. Ganin Malam na sanye da dogon wando kasan farar jallabiyar da ke jikin sa ya sanya Usman daukan Malam cak da ke Usman ba aboci karfi ne, cikin sassarfa ya yi waje da Malam Halitta na biye da shi. Kafin su kai ga farfajiyar gidan in da daliban Malam ke jira Usman ya dakatar da Halitta cikin bada umarni ya ce

“Ka da ki biyo mu, ki koma wajan yan uwan ki ku shedawa duk wanda ya kamata su sani, na mi ki alkawarin kula da shi, za mu tafi asibiti yanzu, wani asibiti ya ke zuwa?.”

Halitta na shirin ma sa musu, Amma yanda ya juyo ya kalli idanun ta cike da tabbacin alkawarin da ya dauka mata ya sanya ta gyada kai tare da fadin

“Premier, a court road ya ke, Dan Allah kada ya rasa ran shi….”

“In Sha Allah……”
Cewar Usman yayinda ya juya da sauri, Halitta na kallan sa har ya kure ganin ta. Yanda ya fito dauke da Malam ya sanya hankali kowa tashi. Tuni daliban Malam su ka to kan sa, kowa na tamabayar lafiya, me ya sami Malam, me ya faru.

 

AUREN SHEHU

3

Ta na zama bisa gado ta ?au wayarta ta kira abokin zuwa club din ta da ta ke kira Bobo, bugu daya ya daga tare da fa?in

“Zeee oh Zeee the slay mama the club mama, diyar Malam ta ki halin Malam! Ai ni na san baki fushi Zeeena…..”

“Eh en fa Bobo!”
Ta katse shi, ba ta gushe ba ta kara da

” Kar ka wani dame ni da dadin baki! Da ka san masifar da ka kusa jawo min jiya da ka ji tsoran ?aga waya ta!”

“Toh yanzu dai Allah ya baki hakuri, ko da ya ke tun da ki ka kira ni ma na san kin huce, wetin dey sup? Malam don commot?”

Cewar Bobo cikin muryar zolaya.
“Ehen na, him don go Maid, toh ya za a yi? Any happening tonight? Amma dan Allah kar ka kai ni club din talakawa, ka san I can’t stand them!”

Ta fada ta na mai yamutsa fuska. Dariyar kyeta ya saki, fadi ya ke

“Heheheheh Zeeena na da?e ban ga wanda ya ke kyamkyamin talauci kamar ki ba, babe don’t worry I got you, ki shirya 12 daidai ta yi mi ki gaban gate din ku, na san dai yau ba batun haurawa tunda Malam baya nan”

“Ba ka da matsala, su Isa ne ai wa’inan, in su ka sa shayi gaba har na wuce ma ba lalle su sani ba, sai ka zo”

Ta na maganar ne yayinda Usman ya fado mata rai, ta na mai adduar Allah ya mata katangar karfe da shi, su ka yi sallama da Bobo ta aje wayar.

***

Kamar yanda ta saba duk sanda ta san ta kulla harkallar ta, ana isha’i ta fara kukan ciwon kai, daga Ammy har Falmat babu wanda ya kawo wani abu cikin ran su, sai ma tararraya ta da su ka din ga yi, musammam ma Ammy. Halitta kuwa ko kallan in da take ba ta yi, dan cike fal ta ke da Zainab. Ammy ce ta bata magani ta sha, ta ce lalle ta je ta kwanta, amma Zainab ta ce ah ah, gwara ta zauna jikin su za ta fi jin dadi.

Sai da ta bari goma da rabi yayi sannan ta ce ciwan ya ci karfin ta, bari ta kwanta dan Allah kada wanda ya shigo ya tada ita, dan idan aka tada ita ba lallai ta iya komawa bacci ba, gashi kuma dama ciwon kai ta ke. Ana bin ta da sannu haka ta mu su sallama, ta koma daki ta yi kwanciyar ta har da kashe wuta.

Da ya ke uwa uwa ce wajen sha daya Ammy ta kasa hakuri, sai ga ta a dakin, ganin wutan a kashe ya sanya ta yin sanda zuwa ga gadon Zainab, wacce jin shigowar uwar ta saki jiki ta yi lum kamar mai bacci. Hannun ta dora bisa goshin Zainab ta na mai hamadala, fadi ta ke

“Alhamdulillah ta sami bacci”
Ta na mai jawo bargo ta dada rufe ta. Sai da ta karanta mata adduar bacci ta shefa jikin ta sannan ta juya ta fita.

Ta na fita Zainab ta yi zumbur ta mike, dan kuwa ta san babu mahalukin da zai sake shigo mata daki tunda har Ammy ta ga ta yi bacci, bari ma kuwa idan akwai wacce za ta iya shigo mata munafunci Halitta ce, ita kuma sun yi fada toh ta tabbatar hakan ta ya cimma ruwa.

Wankan ta tayi ta fito tsaf cikin wondan ta pencil Jean blue tare da yar karamar riga ja, ta faka gashin nan tsakiyar ka kai ka ce ba diyar musulmai ba ce. Ba ta damu da yin make up, dan irin su Zainab ake yiwa kirari da “black beauty better than gold always shining”. Tsadaddiyar powder mai sanya fuska sheki ta shafa, turaruka kuwa 212 sexy, escada magnetism, tare da Indian night Jasmine sai da su ka koka.
Gaban madubi ta tsaya ta na mai karkada kugu ta ke yiwa kan ta kirari

“Zeee oh Zeee the slay mama, the club mama, kuma salihar Dadyn ta”

Sai da ta yi mai isar ta, ganin sha biyu ta kusa ta sanya hijabi har kasa, bayan ta gama gyara gado, ta saita fululluka kai kace mutum ne kwance ta sa bargo ta rufa mu su, takalmin ta mai tsinin gaske a hannun ta na mai sanda ta fito. Ganin wutan falon a kashe ta san kowa ya kwanta, sadaf sadaf ta zaga ta baya ta fice.

Isa kuwa da Jauro masu gadin gidan nan gaban gate su ke kwance bacci ya sace su dan yau ko karnukan gidan ba su sake ba. Kallo ?aya Zainab ta mu su ta ja tsaki tare da fadin

” Ji be su kwance kamar mushe! Idan ma sace gidan za a yi wato a yi tunda Dady bayanan, Allah ya kai mu gobe za ku yiwa Ammy bayani!”

Ba ta kara tsorata ba sai da ta ga gate din bude, wato ko sakata ma ba su sa ba! Har ta juya a fusace za ta tada su, sai ta tuna tana tayar da su shikenan asirin ta ya tonu, ta na mai adduar Allah ya kare su Ammy ta sa kafa ta fita, hakan yayi daidai da dalle ta da tocilit da aka yi, yanda hasken ya dalle idanun ta ya sanya runtse idanun ta na mai fadin

“Oh my God”

Tsaye ya ke ya na duban ta, suna hira da su Isa bacci ya kwashe su, dan haka ya dan fita waje mike kafa. Kusan mitunan shi ishirin waje gaban gate, dake unguwar ba mai hayaniya bace sosai kafar mutane ya dan dauke, jin wani ni’imataccen kamshi ya sanya shi dan waige waige tare da tunanin ko dai aljana mai turare ce ta bakunce yau, wanda fitowar ta ya gasgata masa da haka, dan kuwa dai da ya haske ta ganin ta ya ke tamkar aljanar ce tsaye gaban shi.

Ganin ba a da niyar daina haska ta ya sanya ta kare fuskar ta da tafin hannun ta, cike da nuna bacin rai ta ce

“Dalla Bobo dena haska ni kafin ka sa a kama mu! Kai fa iskancin ka yawa gare shi!”

Jin haka ya sanya shi kashe tocilan ba tare da ya iya furta komai ba, dan kuwa harshen sa ya sarke kamar wanda aka daure harshen cikin bakin sa. Bude idanun ta tayi tare da fadin

“Bobo…..”
Ganin wanda ke tsaye gaban ta sai da ta dan ja da baya, shi din nan dai Usman, sanye da rigar saka da rawani irin na buzaye, hannun sa na dama rike da sandar gora, dayan hannun kuma tocilan ne. Ta na shirin juyawa ta koma sai ga motar Bobo, ai kuwa kafin Usman ya ankare da gudun ta ta nufi motar, ganin haka Bobo ya tsaya ta shige ta na fadin

“Kai let’s get the hell out of here, ina tsoran Allah ina tsoran wannan dan boko haram din can!”

AUREN SHEHU

4.

 

Jin kalmar “Boko Haram” jiki na rawa Bobo ya figi motar ya na mai tayar da kura, fadi ya ke

“How? Ya aka yi ki ka san dan Boko Haram ne?”

Karar yanda Bobo ya figi motar ne ya sanya su Isa da Jauro fitowa a guje suna fadin

“Su waye nan! A tare! A tare!”
Ina sai sahun tayar motor Bobo su ka gani, idan shi kan shi Usman da ke tsaye kamar mutum mutumi Jauro ya ce

“Yo kai ?an cirani kana nan tsaye ashe, me ke faruwa ne?”

Isa ya kara da
“Wacce mota ce ta tashi a guje yanzu? Su waye?”

Maimakon ya ba su amsa, sai ya juya abin sa yayi ciki, suna tafe bayan sa, su ka koma ciki, daki yayi wucewar sa ba tare da ya tanka mu su ba.

Isa da Jauro su ka tsaya jugum jugum suna duban juna, Jauro ne ya gyara tsayuwa ya ce

“Ina Isa? Ni fa Allah na gani ban yarda da wancan dan ciranin ba! Ga fa karar tashin motar da mu ka ji! Mu ka tashi mu ka ga gidan nan bude, shi kuma mu ka taras waje tsaye kamar gunki, Anya kuwa Isa?”

Isa wanda kamar Jauro ya shiga ransa, ya dan yi ta maza ya dake, ya na mai yamutsa fuska ya ce

“Anya kuwa me?”

“Anya kuwa lafiyayyan mutum ne?”

Jauro ya fada cike da damuwa.

“Ka gan shi da wata rashin lafiya ne?”

Cewar Isa cikin dakiya dan ya san in da Jauro ya dosa. Jauro na mai girgiza kai ya sake cewa

“Ka san abin da na ke nufi Isa, dan kuwa na san kai ma zuciyar ka ta yi rawa akan lamarin Usman…..”

“Na raba ka Jauro, na raba ka! Kar ka manta Malam ya karantar da mu akan zato, ya ce zato zunubi ne ko da kowa ya kasance gaskiya, Ni ka ga tafiya ta kunto karnukan nan, da bacci be dauke mu ba ai duk da ba haka ba!”

Isa ya tafi ya na mita, Amma cikin ransa tunanin da Jauro ya ke shi ma din shi ya addabi zuciyar sa.

Usman kuwa can lambu ya shige in da ya saba raba dare, wata yar doguwar kujera ta hutawa ya samu yayi kwance idanun sa na kallan sararin samaniya. Kamanin Zainab ke masa gizo, haka kuma kan sa ya dada kullewa akan lamarin ta,

“Shin ita wannan diyar Malam din ina za ta je da tsohon daren nan? Shin mahaifiyarta ta san da fitar ta? Shi wannan da ya ?auke ta a bakar mota mai bakin gilashi wanene shi?’

Tambayoyin da ya ke yi cikin ran sa ke, wanda ya kagu ya samu amsar su.

Ita kuwa Zainab tun da su ka tafi Bobo ke tambayar ta ya aka yi ta san mutumin nan dan boko haram ne? Wanene shi? Sai da ta nutsu sannan ta iya amsa masa da

“Daya daga cikin daliban Dady ne, kuma ya na mana gadi, haka kawai jinina be hadu da shi ba wallahi, ka ga jiya ma shi ya kama ni, gashi yau ma an kuma! Allah dai ya tushe bakin sa….”

“Wa ya ce mi ki dan boko haram ne?”
Bobo ya sake tambaya cike da damuwa.

“Haaaaa’a! Are you even listening?”

Zainab ta fada cike da tsiwa, ba ta gushe ba ta kara da

“Dallah waye zai yarda dan boko haram ya zauna gidan su? Na ce da kai dalibin Dady ne!”

“Toh Zeeee ke ce na ji kin kira shi da boko haram…..”

“Saboda ya na min kama da su ba! Ba wai ina nufin shi din ba ne, ko da ya ke it’s possible shi din ne tunda ba wai kwakkwarar bincike aka yi ba….”

Ta fada ta na kallan Bobo wanda ya fara hada zufa. Dariya ne ya kwace mata, ta ce

“Sai shegen tsora, dallah wasa na ke ma”
Bobo na mai goge zufa da hankaci ya ce

“Ai dai mutanan ne abun tsoro, Allah ya mana tsari da su, mugu be da kama Zee”

Cikin faduwar gaba yayin da kamannin Usman su ka bayyana a zuciyar ta, ya fito mata sak a kamannin mugu, ta na mai saurin kawar da tunanin ta ce

“Amen, Allah ya min tsari da shi!”

“Wa fa?”

“Dan Boko haram mana, Maigadin gidan mu!”

Ta fada kai tsaye.
“Ki ka ce ba dan boko haram ba ne?”

Bobo ya sake tambaya cike da damuwa.
“Aaaarrrrghhhh Bobo don’t spoil my mood!”

Ta fada cikin tsawa. Hannun ya daka tare da fadin

“Allah ya baki hakuri Zeee Mama!”

“Ba Allah ya ba ni hakuri ba, you better take me to a nice club!”

“I got you, kafin nan bari na baki sauti mai dadi”
Cewar Bobo yayinda kunna waka ya na mai kure karar.

Ranar club yayi ma Zainab dadi, ta hadu da sabon saurayi wanda tare su ka cashe a daren ranar har ta shagala da lokaci, dan kuwa dai ba ita ta ankara ba sai da shida ta wuce. A kidime ta azalzali Bobo wanda ta janyo shi tsakiyar kedaru su na cashewa. Sabon saurayin da ya Kira kan sa Mike ne ya nuna dacewar ya aje ta gida, hakan ba karamin dadi yayiwa Bobo ba, amma Zainab ta hana, ta dai ce ya bari sa yi magana daga baya. Haka su ka yi sallama Bobo na mitar ta katse masa shagali su ka dauki hanyar gida.

Dab da za su shiga unguwar ya kalle ta ya ce

“Babe kin katse min runs wallahi”

“Mtswww”

Ta ja tsaki ba tare da tanka ma sa ba, gaba daya hankalin ta ba ya tare da ita, shikenan yau kam asirinta ya tono, tun da take zuwa club ba ta taba kaiwa haka a waje ba, har a idar da sallar asuba ba ta koma gida ba? shin me za ta ce da Ammy idan har ta shiga dakin ta tashin ta sallar asuba ta ga ba ta dakin? Ya ma za ta yi ta shiga gida gari waye haka babu daman ta haura? Kuma ta san su Isa da Jauro ba lalle sun bude gidan ba in ba dai dan boko haram din nan ya kwana nan in da ta barshi tsaye ba ne, wanda ko jikin ta kunne ne ta san ba abu ba ne mai yiyuwa ba, kila ma ya riga ya fadawa Ammy fitar ta…..

Tsigar jikin ta ne ya tashi yayinda gaban ta yayi mummunar faduwa, a zahiri kuma fadi ta ke

“Ya Ilahi…..”

“Kai Zeeena ashe kin iya ambaton Allah!”
Cewar Bobo cike da zolaye. Harara ta watsa masa, tare da fadin

“Dadi na da kai Bobo rashin sanin ciwon kai! Ba ka ga halin da na ke ciki ba ne wai?”

Dariya ya ke yayin da ya sami waje ya faka, suna hango gidan Malam ya ce

“Come na, stop panicking! Kwantar da hankalin ki babe, calm down, ki fita ki je gate din gidan ku, idan bude ya ke ki shigewar ki kai tsaye, ba kya bin masu gadin ku bashin bayani, idan rufe ya ke ki buga mu su su bude mi ki, gidan uban ki ne, idan Momcy ta gan ki tell her kin fita exercises ne, shikenan!”

“Yen yen yen yen! Ni na rasa yanda aka yi na ke mu’amala da kai Bobo! Duk randa na fita da kai sai ka jawo min matsala!”

Ta na gama fadin haka ta fice a fusace tare da buga masa murfin mota. Zuciyar ta na bugu ko wani taku ta yi, wayar Halitta ta shiga kira, ta yi ringing ta gama ba ta daga ba, hannu na rawa ta kira Falmat, ita ma din ba ta daga ba, isar ta gate din ta dan tura ta ji a rufe, sai da ta dan yi jim sannan ta yi karfin halin bugawa. Har ta fitar da rai da bude gate din, ta na shirin juyawa sai ta ga an bude hujun da aka yi jikin gate din domin ganin na waje.

Idanun ta ta tsinta cikin na sa, tuni ta tsinci kanta cikin mummunar faduwar gaba, yayin da bugun zuciyar ta ya karu, sai da yayi sakanni ya na kallan ta, ta na mai cuna kumatu cike da tsiwa ta ke mayar masa da martanin kallan, dan kuwa tsoro baya hana Zainab rashin kunya..

“Malam dalla ka bude min gate! Ka zuba min na mujiya ba ka taba ganina ba ne?”

Ga mamakin ta sai kuwa ya bude, shigar nan dai da ta gan shi da ita jiya da daddare, shi ne jikin sa, Goran nan dai be aje ba, ta na rike hannun sa na hagu, hannun sa na dama kuma ruke da rediyo ya na jin labarai.

Ko kallan sa ba ta kara yarda ta yi ba, bare su hada idanu kai tsaye ta wuce ciki kamar dai yanda Bobo ya ce ta yi, addua ta ke Allah ya rufa mata asiri kar ta hadu da Isa ko Jauro, sa’ar da ta yi da an idar da sallar asubahi su ke komawa su yi baccin su tun zuwa Usman gidan, shi kadai su ke bari da gadin safe, karnuka kuwa ana kiran sallar farko ake daure su, saboda kar su dami masu sallah masallacin gidan da haushi, duk da dai ta waje masallacin ya ke.

Sai da ta kurewa ganin sa, zuciyar sa cike da tunani kalala wanda duk yanda ya so ya cire daga zuciyar sa ya gagara, ya mayar da gate ya rufe.

“Innalillahi wainnailaihi ilaihi rajiun! Babu shakka Allah ya jarabci Malam da diya kamar yanda ya ke jarafta salihan bayin sa cikin ikon sa! Ya Allah ka kare Malam daga sharrin wannan Bingel!”

Cewar shi a zahiri, yayinda ya koma mazaunin shi bisa benci, ya kishingida ya na mai cigaba da sauraron labaran shi a tashar BBC hausa.

Cikin sanda takalman ta a hannu ta ke tafiya, ta kitchen ta bi ta shiga falon, dab da zata karasa dakin ta muryar Halitta ya daki kunnan ta

“Yakura daga ina ki ke?”

Jiki na rawa ta saki takalman su ka zubi kasa, Kallan Halitta ta ke ta na mai waige waige ta ga ko ita kaidai ce. Ita kadai din ce sanye cikin hijab har kasa, hannun ta ruke ta carbi dan Halitta ba ta komawa bacci bayan sallar asuba, zama ta ke ta yi zikiri da adduo’i har gari ya waye rana ta fito, sannan ta shiga kitchen ta taya iya abin karin kumallo. Ta fito za ta kitchen din kenan su ka yi kacibus da Zainab ta na sanda za ta shige dakin ta.